Qazirgi tańda aýyl men qala mektepteri arasyndaǵy bilim berýdiń alshaqtyǵy ózekti máseleniń biri ekeni anyq. Búgingi Tamyz konferensııasynda aýyl mektebindegi bilim sapasyn arttyrý máselesi de kóterilip, osy saladaǵy tyń ıdeıalar talqylandy. Sondyqtan mundaı jıynnyń aýyl mektebindegi bilim sapasyn kóterýge septigi tıedi dep oılaımyn. Sondaı-aq aýyl mektebinde sıfrlyq resýrstar men bilim platformalary da qoljetimdi emes. Oǵan qosa aýyldaǵy ınternet jyldamdyǵynyń tómendigi, pán muǵalimderiniń jetispeıtini, jaratylystaný pánderi boıynsha zerthanalyq kabınetterdiń azdyǵy nemese múldem joqtyǵy oqýshylardyń sapaly bilim alýyna kedergi keltiredi.
Osy máselelerdi sheshý úshin Aqtóbe oblysynda «Sıfrly tehnologııalardy qoldanyp, shaǵyn jınaqty aýyl mektepteriniń áleýetin damytý» atty qanatqaqty joba júzege asty. Joba aıasynda óńirdegi shaǵyn jınaqty mektepterdiń 66 paıyzy ınteraktıvti paneldermen, pedagogterge arnalǵan derbes kompıýterlermen, pánder boıynsha arnaıy kórnekiliktermen, tolyqtaı sıfrlyq kabınettermen jáne zamanaýı bilim berý quraldarymen jabdyqtaldy. Bul – aýyl mektepterine memleket tarapynan kórsetilgen qoldaý. Jabdyqtalǵan kabınetterdegi ınteraktıvti panelderde «BilimLand», «Daryn Online», «Roqed Science» sıfrlyq bilim berý platformalary ornatyldy. Sonymen qatar aýyl mektepteriniń ınternet jyldamdyǵyn jaqsartý maqsatynda birqatar jumys atqaryldy.
Máselen, ózim eńbek etetin Taldysaı orta mektebi magnıttik bilim ordasy retinde jumys isteıdi. Bul qanatqaqty jobanyń maqsaty – qala jáne aýyl mektepteri arasyndaǵy alshaqtyqty azaıtyp, shaǵyn jınaqty mektepterde onlaın bilim berý tehnologııalaryn halyqaralyq standarttarǵa saı qoldanysqa engizý. Aldaǵy ýaqytta osy jobany respýblıkalyq deńgeıge kóterse, kóptegen shaǵyn jınaqty aýyl mektebiniń bilim sapasyn arttyrýǵa jaǵdaı jasalatyny sózsiz.
Meıirbek QOJAǴULOV,
Aqtóbe oblysy, Qobda aýdany, Taldysaı aýyldyq orta mektebiniń muǵalimi