Aýdaryspaqtan ulttyq qurama músheleri oqý-jattyǵý jıynyn endi Astana qalasynda jalǵastyrady. Buǵan deıin Almaty oblysynda jattyǵý júrgizip, 6 tamyzdan bastap dodaǵa daıyndyqty kúsheıtti.
Aýdaryspaqtan ulttyq quramanyń bas bapkeri Janbatyr Bekmursaev shákirtteriniń daıyndyǵy qalaı ekenin aıtyp berdi.
«Dúnıejúzilik kóshpeliler oıyndaryna daıyndyqty eki ret ótkizdik. Ulttyq quramaǵa qabyldanǵan balýandar josparly jattyǵýdy ótkizip, fızıkalyq, taktıkalyq turǵydan kemshin tusyn bútindep jatyr. Jigitterdiń mingen attary da úırenisip keledi. Bizdiń maqsat – elimizde ótetin alamanda top jarý. Osy mejeden kórinýge bilek túrinip ázirlenip jatyrmyz», dedi bas bapker.
Ulttyq quramanyń múshesi, aýdaryspaqtan eki dúrkin álem chempıony Daryn О́tkelbaı ózi tuńǵysh qatysatyn Dúnıejúzilik kóshpeliler oıyndarynda jeńiske jetýge baryn salatynyn aıtty.
«Aýdaryspaq oıynyna bala kúnimnen qyzyǵýshylyǵym artty. Erlerdiń at ústindegi qaırat-kúshi synalatyn saıysta aıanyp qalmaımyz. О́zim 80 kg salmaqta dodaǵa túsemin. Negizgi qarsylas Qyrǵyzstan, О́zbekstan, Mońǵolııa jáne Reseıden keletin sportshylar bolmaq. Degenmen óz elimizde ótetin alamanda top jarý – báriniń armany. Men de chempıon atanýǵa barymdy salamyn», dedi D.О́tkelbaı.