Grýzııanyń bas shahary Tbılısıde uıymdastyrylǵan FIDE-niń Gran-prı týrnıri álemniń ataqty shahmatshylarynyń basyn qosty. Solardyń arasynda Bıbisara Asaýbaeva da bar.
Jarystyń aıaqtalýyna nebári eki týr qalǵanda qazaqtyń daryndy qyzy alǵa shyqty. Bul rette ol Ispanııanyń namysyn qorǵaǵan ırandyq Sarasadat Hademalsharıeh pen Shveısarııanyń týy astynda óner kórsetip júrgen reseılik Álem jáne Eýropa chempıony, Álem kýboginiń jeńimpazy Aleksandra Kostenıýkty qapy qaldyrdy. Al Lela Djavahıshvılı men Nana Dzagnıdze (Grýzııa), Marııa men Anna Mýzychýk (Ýkraına), Alına Kashlınskaıamen (Polsha) upaı bólisti. Qalǵan eki oıynnyń eń bolmaǵanda bireýin jeńispen aıaqtaǵanda bas júlde Bıbisaraǵa buıyratyn edi. Alaıda Stavrýla Solakıdý (Grekııa) jáne Rameshbabý Vaıshalıge (Úndistan) qarsy kezdesýler teń aıaqtaldy. Sóıtip, 9 múmkindikten 5,5 upaı jıǵan Asaýbaeva kúmis medaldy moınyna ildi. Birinshi oryndy Alına Kashlınskaıa oljalasa, Stavrýla Solakıdý úshinshi satyǵa taban tiredi.
– Búgin Tbılısıde áıelder arasyndaǵy Gran-prı dodasynyń birinshi kezeńi aıaqtaldy. Bul serııa úsh týrnırden turady. Sol jarystarda jer-jahannyń 20 úzdik shahmatshysy bir-birimen sheberlik baıqasyp, «Úmitkerler týrnırine» qatysýǵa jol ashatyn eki joldama úshin talasady. Grýzııanyń astanasynda men 9 múmkindikten 5,5 upaı aldym. Bir qýantarlyǵy, birde-bir básekede utylǵan joqpyn. Nátıjesinde, ekinshi oryndy enshiledim. Árıne, odan da jaqsy nátıje kórsetýge tyrysqanym ras. Endi kelesi joly bas júldeni oljalaý úshin barymdy salamyn, – deıdi B.Asaýbaeva.
FIDE-niń Gran-prı týrnıriniń kelesi kezeńi osy jyldyń qazan aıynda Shymkentte ótedi. Sol jarysta da ataqtary alysqa jaıylǵan kóptegen myqty grossmeıster óner kórsetedi.