Elimizdiń ár aımaǵynda «Abaılańyz, balalar!» naýqany jalǵasyp jatyr. Oqý jylynyń bastalýy qarsańynda dástúrli uıymdastyrylatyn aksııa bıyl 26 tamyz ben 6 qyrkúıek aralyǵynda ótkiziledi. Mundaǵy maqsat – oqys oqıǵalardyń aldyn alý, balaqaılardyń joldaǵy qaýipsizdigine nazar salý. Ásirese kólik júrgizýshilerin mektep mańynda saq bolýǵa shaqyrý.
Jyl basynan beri elordada balalardyń qatysýymen 123 jol-kólik oqıǵasy tirkelgen. Onyń ishinde kámeletke tolmaǵan 126 bala zardap shekse, ókinishke qaraı, bir jasóspirimniń ómirin qutqarý múmkin bolmaǵan.
«Balalardyń jol-kólik oqıǵalaryna túspeýiniń, jaraqattanýynyń aldyn alý, kámeletke tolmaǵandardyń kósheler men joldarda qaýipsiz júrip-turýyna baılanysty daǵdylaryn bekitý óte mańyzdy. Bul iske ásirese oqý jyly bastalýy qarsańynda erekshe den qoıylady. Osy oraıda respýblıkalyq aksııa aıasynda jappaı qala aýmaǵynda ornalasqan barlyq mekteptiń oqýshylaryna tanymdyq is-sharalar ótkizilip jatyr. Máselen, keshe Astana qalasyndaǵy №54 mektep-lıseıiniń jas jol ınspektory mektep jasaǵymen birlesip avtokólik quraldarynyń júrgizýshilerine jol taqyrybyndaǵy 30-ǵa jýyq jadynamany taratý arqyly «Júrgizýshi, bizdi qorǵańdar!» úgit-nasıhat aksııasyn júrgizdik. О́skeleń urpaqtyń qatelikke urynbaýy úshin jol erejesi boıynsha saýattylyqty arttyrýda mundaı is-sharalardyń mańyzy zor», deıdi Astana qalasy Baıqońyr aýdany Polısııa basqarmasy Jergilikti polısııa qyzmeti bólimi Iývenaldyq polısııa bólimshesiniń ýchaskelik polısııa ınspektory, polısııa kapıtany Hafız Muqyshev.
Aksııa aıasynda bilim organdarymen, mekteptegi qozǵalystyń jas ınspektorlary jasaqtarymen birlesip, avtokólik quraldary júrgizýshilerine jadynamalar, jol taqyrybyna jazylǵan balalar shyǵarmalary úlestirilip, «Júrgizýshi nazaryna!» nasıhat aksııasy uıymdastyrylady.