Ásem qandaı qurmetke de laıyq

Qansyraǵan qaryndasymyzdyń el bolyp eleýge turatyn erligi –  qutqarýshylar apatqa ushyraǵan ushaqty taýyp alǵansha baılanysty úzbeı, baǵyt bergendiginde 20 qańtar kúni «Shatyrkól» kenishiniń aýmaǵynda qaıǵyly oqıǵa boldy. «Olımp Eır» JShS ushaǵy Balqash – «Shatyrkól» kenishi baǵytymen ushyp kele jatqan. Onyń bortynda  jeti adam boldy, úsheýi ekıpaj músheleri. Qarly dalaǵa qulap, úıindi temirge aınalǵan áýe kóliginen Ásem Shaıahmetova ǵana aman qaldy. «Aman qaldy» deý, aıtýǵa ǵana ońaı. Al Ásem sol sátte birneshe jerden synǵan aıaǵynyń aýyrǵanyna qaramastan bir metr­ge jýyq qasat qardyń astynan shyǵyp, qaza tapqan ushqyshtyń uıaly telefonymen qutqarý qyzmetine habarlasyp, oryn alǵan áýe apaty jóninde jedel aqparat bergen. Bul da aıtýǵa ońaı. О́ıtkeni, qatty soqqydan zardap shegip, sansyz jaraqattardyń saldarynan qansyraǵan qyzdyń áýeli Qyzylorda oblysynyń tótenshe jaǵdaılar jónindegi departamentine, odan keıin Jambyl oblystyq tótenshe jaǵdaılar jónindegi departamentke habarlasýy erdiń eriniń ǵana qolynan keletin tózimdilik. Bul da aıtýǵa ońaı. Jany siri Ásemniń el bop eleýge turatyn erligi – qutqarýshylar apatqa ushyraǵan ushaqty qashan taýyp alǵansha uıaly telefon arqyly baılanysyn úzbeı, baǵyt-baǵdar berip otyrýynda bolyp tur. О́ıtkeni, Ásem baılanysty úzse, qoıýlanyp kele jatqan keshki qarańǵylyq yzǵarly dalada bolǵan apatty  qutqarýshylar nazarynan búrkep qalar edi. Jeteýdiń ishinen jalǵyz ózi aman qalǵan Ásem úshin ári qaraı aıtýdyń ózi qorqynyshty... Búginde Ásemniń jaǵdaıy jaqsaryp keledi. Ol á degende, ıaǵnı oqıǵa bolǵan jerden Shý aýrýhanasyna jetkizilgen kezde dáriger-hırýrgtermen tildesip: «Aıaǵymdy kespeńizdershi», dep ótinipti. Boıjetken tilegi, árıne, túsinikti. Búginde bilikti dáriger-hırýrgter áýe apatynan aman qalǵan qyz, qudaı qalasa, bir jyldan keıin aıaǵynan tik turyp ketedi dep otyr. Ásem – adam balasynyń basyna qandaı qıyndyq týsa da úmit úzbeý kerektigin búgingi jastarǵa óz isimen úlgi retinde kórsete bildi. Ol óziniń qaısarlyǵy arqyly keshegi Álııa, Mánshúk ápkeleriniń erligin qaıtalaı alatyn sińlileri Qazaq elinde búgingi beıbit zamanda da bar ekenin pash etti. Árıne, qaısar qyz bul úshin eshqandaı qurmet izdep, eshqandaı ataq suramaıdy. Biraq onyń ójettigin bolashaq urpaqqa taǵylymdy tárbıe ete bilý úshin el azamattary esti tirlikke baryp, Ásem úlgisin qalaı qurmettep, qandaı marapatqa usynsa da laıyq dep oılaımyz. Kósemáli SÁTTIBAIULY, jazýshy. Jambyl oblysy, Shý aýdany, Shatyrkól kenishi.