Batys Qazaqstan oblysynda kóktemgi tasqynnan zardap shekken saıajaı turǵyndary úıli boldy. Oral qalasyna qarasty Derkól kentinde jańadan salynǵan 103 úıdiń kilti Konstıtýsııa kúni tabystaldy.
Bul úıler «Eurasian Resources Group»-tyń (ERG) negizin qalaýshy-aksıonerleri bólgen qarajat (40 mlrd teńge) esebinen salynǵan. Jańa úılerdi berý rásimine oblys ákimi Narıman Tóreǵalıev pen «Eýrazııalyq Top» JShS bas dırektorynyń orynbasary Danııar Rahmatýllaev qatysty.
– Memleket basshysy Qasym-Jomart Kemelulynyń tapsyrmasyna sáıkes tasqynnan zardap shekken turǵyndarǵa zań aıasyndaǵy tıisti kómek kórsetildi. Búgin biz Oral qalasynyń saıajaılar alqabynda turyp, tasqynda baspanasynan aıyrylǵandarǵa jańa úılerdiń kiltin tabys etip jatyrmyz. Bul – jalpy óńir úshin úlken qýanysh. Qurylys jumystaryna qoldaý kórsetken «ERG» kompanııasynyń ókilderine shyn júrekten alǵys aıtamyn», dedi N.Tóreǵalıev.
«Oraldaǵy osy úıler de «Eurasian Resources Group» (ERG) kompanııasy bólgen qarajatqa satyp alynǵan. Kompanııanyń negizin qalaýshy-aksıonerleri tasqynnan zardap shekkender úshin kómekke 40 mlrd teńgeden asa qarajat bólgen edi. Barsha qonys ıelerin búgingi qýanyshymen quttyqtaımyn», dedi D.Rahmatýllaev.
Oraldaǵy «Nurly jol» saıajaıynyń turǵyny Maral Oralovanyń úıi tasqyn kezinde sý astynda qalǵan edi. Ol memlekettiń kómegi arqyly búgin sapaly baspanaǵa ıe bolǵany úshin alǵys aıtty.
«Kezinde «Nurly jol» saıajaıynan úı salǵan edik. Kóktemde úıimiz sýǵa ketti. Prezıdentke rahmet, bizdi dalada qaldyrmady. Búgin Derkól kentinen 3 bólmeli úı buıyrdy. Úıdiń ishin qarap shyqtyq, keremet dep aıtsaq bolady. Sapasy da jaqsy», deıdi M.Oralova.
Batys Qazaqstan oblysy ákimdiginiń baspasóz qyzmeti habarlaǵanyndaı, bıyl sý tasqynynan zardap shekkender úshin Batys Qazaqstan oblysynda 775 úı salynǵan. Onyń 375-si – Oral qalasynda, 400-i – aýdandarda.
Batys Qazaqstan oblysy