Fransııanyń Parıj qalasynda ótip jatqan Paralımpıada dodasynda qorjynymyzǵa kúmis medal tústi. Paranysana kózdeýden jazǵy Paralımpıada oıyndarynda jerlesimiz Erkin Ǵabbasov R1 sanatynda vıntovkamen 10 metr qashyqtyqtan synǵa túsip, 247.7 upaımen kúmis júldeger atandy.
Qazaqstan atletteri 1996 jyldan beri jazǵy Paralımpıada dodasyna turaqty qatysyp keledi. Parıj tórindegi saıysqa 44 sportshy attanyp, paradzıýdo, parapaýerlıftıng, parataekvondo, parajeńil atletıka, paranysana kózdeý, paraústel tennısi, parajúzý, parakanoe jáne voleıboldy otyryp oınaý syndy sporttyń 9 túri boıynsha júlde úshin tartysady. Elimizdiń sportshylary alǵash ret paraústel tennısinen, áıelder arasynda parakanoeden joldama ıelenip, tórtjyldyq alamanynda baq synap jatyr.
О́kinishke qaraı, Erkinniń jeńisti jolyn jalǵaıdy dep úmit artqan Sevda Álıeva SH1 sanatynda 10 metrge pnevmatıkalyq tapanshadan nysana kózdeýdegi upaıy tómen bolyp, 13-oryndy mise tutty.
Parajeńil atletıka sportynda úmit artqan sańlaǵymyz Gúlbaqyt Qaıyrjanova naıza laqtyrýda (F13 sanaty) 34.23 metr nátıjesimen besinshi orynǵa turaqtady.
Toptan shyǵýǵa múmkindik bar
Voleıboldy otyryp oınaý saıysynan bizdiń quramaǵa Paralımpıada joldamasy uzaq jyldan beri buıyrmaı kelgen edi. Bilikti maman Baýyrjan Tahaýov baptaıtyn ulttyq qurama byltyr Astana qalasynda ótken lısenzııalyq týrnırde top jaryp, Parıj Paralımpıadasyna joldama oljalaǵan edi.
Dodaǵa sýsap alańǵa shyqqan jigitter toptyq kezeńdegi tartysty jeńispen bastaǵan. Fransııa tórindegi Paralımpıadanyń voleıboldy otyryp oınaý synyna álemniń úzdik 8 quramasy ǵana qatysyp jatyr. Qurlyqtyq hám álemdik irikteýden ótken úzdikterdiń qaı-qaısysy da osal emes. Bizdiń jigitter alǵashqy oıynda azýly Fransııa quramasyn 3:0 esebimen úsh sette eńsergen edi. Biraq ekinshi aınalymda jazǵy Paralımpııa oıyndarynyń úsh dúrkin chempıony Bosnııa jáne Gersegovına quramasynyń ekpinin toıtara almaı, 2:3 esebimen tize búkti.
«A» tobynda Qazaqstan, Fransııa, Bosnııa jáne Mysyr oınaıdy. Al «B» tobynda Iran, Ýkraına, Brazılııa jáne Germanııa quramalary tartysqa túsedi. Bas bapker ulttyq qurama músheleriniń jazǵy Paralımpıada oıyndaryna alǵash qatysýy da aıtarlyqtaı sezilgenin jasyrmady.
«Qobaljý bolatyny anyq, birinshi oıynda fransýzdardy utqanymyz kádimgideı serpilis ákeldi, sańlaqtardyń jeńiske degen senimi nyǵaıdy. Biraq ekinshi aınalymda óte tegeýrindi qarsylaspen jolymyz túıisip, jigitter baryn saldy. Áli de toptan shyǵatyn múmkindigimiz bar», dedi B.Tahaýov.
Qola da buıyrmady
Parıj tórinde parataekvondodan tartysqa túsken Mılana Krasavseva toptyq kezeńdi jeńispen bastaǵan edi. 52 kg (K44 klass) salmaqta senim artqan sportshymyz Domınıkan Respýblıkasynan qatysqan qarsylasy Geraldo Dıasty aıqyn utqanymen, shırek fınalda meksıkalyq Djessıka Garsııa Kýıdjannan jeńildi.
Parataekvondodan 80 kg deıingi salmaq dárejesinde (K44 klass) Nurlan Dombaev qola medal úshin jekpe-jekte ońtústikkoreıalyq sportshy Djý Djonhýnǵa ese jiberdi. +80 kg salmaqta synǵa túsken Nyshan О́mirálige (K44 klass) de Paralımpıada medalin oljalaıtyn múmkindik týǵan. Irak sportshysyn erkin eńserip, mereıimizdi tasytqan sańlaq shırek fınalda amerıkalyq Evan Medelden asa almady. Al jubanysh synynda horvatııalyq qarsylasy Ivan Mıkýlıchti utqanymen, qola júlde úshin ótken jekpe-jekte ırandyq sportshy Hamed Hagshenas Nyshannan basym tústi.
57 kg salmaqta Paralımpıada dodasyna qatysqan Kamıla Dosmalova (K44 klass) shırek fınaldyq aıqasta serbııalyq Marııa Mısevten jeńildi. Jubanysh saıysynda fıdjılik Iren Mardy 12:6 esebimen aıqyn utqanymen, qola medalǵa talasta brazılııalyq Sılvana Maıara Kardozoǵa ese jiberdi.
Parajúzýden 2016 jyly ótken Rıo Paralımpıadasynyń chempıony Zúlfııa Ǵabıdýllına 150 metr qashyqtyqta baq synap, 10-orynǵa turaqtady da, fınalǵa shyǵa almady. Paraústel tennısinen tuńǵysh ret Paralımpıadaǵa qatysqan Álı Maqulbekov belgııalyq Mark Ledoǵa jol berip, alǵashqy aınalymnan aspady.