Astana qalasynda ótetin V Dúnıejúzilik kóshpeliler oıyndary aıasynda elordada bes etnoaýyl ashylady, dep habarlaıdy Egemen.kz qala ákimdiginiń baspasóz qyzmetine silteme jasap.
2024 jyldyń 6-14 qyrkúıek aralyǵynda «Qazaq eli» monýmenti, «Atatúrik» saıabaǵy, «Báıterek» monýmenti jáne Ortalyq saıabaq aýmaǵynda etnoaýyl jumysyn bastaıdy.
Qala ákimdiginiń habarlaýynsha, etnoaýyl aýmaǵynda konserttik baǵdarlamalar jáne sporttyq is-sharalar uıymdastyrylady. Konserttik baǵdarlamaǵa Mádenıet basqarmasynyń vedomstvolyq baǵynysty mekemeleriniń shyǵarmashylyq ujymdary men solısteri, sondaı-aq belgili óner qaıratkerleri men otandyq estrada juldyzdary qatysatyny atap ótildi. Konserttik baǵdarlama etnoaýyldarda saǵat 18:00-den 20:00-ge deıin jalǵasady.
Etnoaýyl uıymdastyrylatyn aýmaqtar:
Esil aýdanynyń aýmaǵynda «Báıterek» monýmentiniń alańynda; Almaty aýdany «Qazaq eli» monýmentiniń janynda; Baıqońyr aýdany «Atatúrik» saıabaǵynda; Nura aýdany Ortalyq saıabaqta ornalasatyn bolady.Aıta keteıik, 7 qyrkúıek kúni saǵat 11:00-de «Qazanat» ıppodromynyń janynda 10 gektar jerde basty «Kóshpeliler Álemi» etnoaýyly ashylady. Etnoaýyl birneshe orynǵa bólinedi: Ortalyq alań, ulttyq oıyndarǵa arnalǵan balalar oıyn alańy, halyq mýzykasyna arnalǵan shatyr, ashyq aspan astyndaǵy kóshpeli О́rkenıetter murajaıy, sporttyq is-sharalar, ulttyq taǵamdar, basty sahna, aımaqtardyń etno-qonystary, qolónershiler jáne shyǵys bazary bar arnaıy qala. Sondaı-aq etnoaýyl aýmaǵynda kóptegen kádesyılar tabýǵa bolatyn shyǵys bazary uıymdastyrylyp, elimizdiń eki júzden astam qolónershileri óz ónimderin usynady.Sonymen qatar etnoaýylda týrıster men qonaqtarǵa arnalǵan dástúrli jáne ulttyq taǵamdardan dám tatý úshin qazaq ulttyq taǵamdarynyń meıramhanalary uıymdastyrylady.Eske sala keteıik, V Dúnıejúzilik kóshpeliler oıyndary Astanada 8-13 qyrkúıek aralyǵynda ótedi, oǵan álemniń 89 elinen 2500-den astam qatysýshy qatysady.