Dúbiri jaqynnan estiletin V Dúnıejúzilik kóshpeliler oıyndarynyń ınfraqurylymy da barlyq talapqa saı jabdyqtalǵan. Dúbirli doda ótetin nysandarǵa jóndeý jumysy júrgizilip, talapqa saı jańartyldy. Tórtkúl dúnıeniń ár tarabynan keletin qatysýshylar úshin barlyq jaǵdaı jasalmaq. Dúnıejúzilik kóshpeliler oıyndaryna arnaıy soǵylǵan atqora, qustardy ustaıtyn oryn, janýarlardyń jemshóbi men sýyn saqtaıtyn qoıma, jaraqattanǵan jaǵdaıda emdik sharasyn kórsetetin veterınarlyq klınıka dodany qabyldaýǵa daıyn.
Aýyl sharýashylyǵy mınıstrligi Veterınarııalyq baqylaý jáne qadaǵalaý komıtetiniń Astana qalasy boıynsha aýmaqtyq ınspeksııasynyń, elorda ákimdiginiń, «Astana vetservıs» KMM-nyń ókilderi nysandardy aralap kórdi. Kóshpeliler oıyndarynda sportshylar minetin jylqylar «Arǵymaq» at-sporttyq saýyqtyrý kesheni men «Qazanat» ıppodromynyń qoralaryna baılanady.
Etnosport dodasyna qusbegilik saıys boıynsha barlyǵy 45 bas qus qatysady. Elordaǵa elimizdiń saıatshylary baptaǵan qyrandarynan syrt Mońǵolııadan 3 bas búrkit, Qyrǵyzstannan 3 bas búrkit, 3 bas ıtelgi, 3 bas qarshyǵa jetkiziledi. Qustar Astanalyq sırkke jaıǵastyrylyp, qaýipsizdik sharasy qatań saqtalady.
Kóshpeliler oıyndarynda qusbegiler búrkit, qarshyǵa, jáne suńqar saıysy boıynsha sheberlik kórsetedi. Komanda quramynda úsh qusbegi, bir bapker hám bir veterınar maman bolady. 18 jastan asqan sportshylar ǵana qatysa alady. Saıysta suńqardy jemtikke ushyryp ábjildigin synaıdy. 3 mınýt ishinde áýelep ushqan suńqar jerdegi jemtikke neshe márte shúıilgeni jáne qansha ýaqytta jetkenin tóreshiler esepke alyp baǵalaıdy.
Búrkit salýdan da ár komandada úsh sportshy bolady. Olar eki jattyǵý boıynsha qyrandarynyń sheberligin pash etedi. Aldymen qolǵa shaqyrsa, ekinshi synaqta shyrǵaǵa túsirýden eptiligin áıgileıdi. Tóreshiniń belgisinen keıin qolyna jemtik ustaǵan búrkitshi aqıyǵyn ózine shaqyrady.
Qarshyǵasyn baptap kelgen qusbegiler de osy talappen qatysady. Qyraǵy qusynyń ushqyrlyǵy, jerdegi jemtikke neshe márte shúıilip túskeni saralanady. Kóshpeliler oıyndarynda saıatshylardyń saıysy respýblıkalyq «Qusbegilik» federasııasynyń erejesimen uıymdastyrylady.