Jańa qurylǵan tergeý toby zerthanalyq saraptamanyń nátıjesi boıynsha naqty sharalar qabyldaıtyny habarlandy.
«Ashanadan alynǵan as synamalarynyń qorytyndysy áli daıyn emes. Mańǵystaý oblystyq sanıtarııalyq-epıdemıologııalyq baqylaý departamentiniń erejesine sáıkes erteń, 10 qyrkúıekte zerthanalyq synamalardyń qorytyndysy shyǵarylady», dep habarlady oblys ákimdiginiń baspasóz qyzmeti.
Aıta keteıik, 6 qyrkúıek kúni Munaıly aýdanyndaǵy 8-mektepte bolǵan jaǵdaı boıynsha aýdandyq PB-niń SDTBT-ne QR QK-niń 304-baby 1-bóligimen №244750031000356 qylmystyq is tirkelip, sotqa deıingi tergep-tekserý jumystary bastaldy.
«Búgingi tańda 460 bala dárigerge júgingen, onyń 377-si úı jaǵdaıynda baqylaýǵa jiberildi. 83 bala oblystyq balalar juqpaly aýrýlar aýrýhanasyna jatqyzyldy. Al jansaqtaý bóliminde jatqan eki bala búgin jalpy palataǵa aýystyryldy. Jaǵdaı turaqty. Oqýshylardyń densaýlyǵy jaqsaryp keledi. Al baqylaýda bolǵan basqa oqýshylar búgin mektepke bara bastady», dep naqtylady ákimdik ókilderi.