Halyqaralyq «Uly dala joryǵy» aıaqtaldy

Dúbirli alamandy Týrızm jáne sport mınıstrligi, «Amanat» partııasy jáne Sportty qol­daý qorynyń qarjylaı de­meýimen Ulttyq sport túrleri qaýymdastyǵyna qaraıtyn «Joryq» federasııasy uıymdastyrdy. Etnosport Olımpıadasy sanalatyn Dúnıejúzilik kóshpeliler oıyndaryna oraı «Qazanat» ıppodromynyń mańynda boı kótergen etnoaýylda jeńimpazdar men júldegerler qurmetke ke­neldi. Shabandozdardy marapattaý rásiminde «Amanat» partııasynyń atqarýshy hatshysy Dáýlet Káribek mádenıetimizdi nasıhattaý, ulttyq sportty damytý Memleket basshysy Qasym-Jomart Toqaevtyń únemi basty nazarynda ekenine toqtaldy.

«Atyraýda ótken Ulttyq qu­ryl­taıdyń úshinshi otyrysynda Prezıdent Q.Toqaev Qazaqstan Uly dala tósindegi kóshpeliler órkenıetiniń tikeleı murageri ekenin aıtty. О́zderińiz bile­sizder, atqa miný mádenıeti qazaq jerinen bastaý alady. Buǵan osydan 5 myń jyl buryn jylqyny qolǵa úıretken Botaı qonysy dálel. Qazirgi tańda túrki halyqtary ata-babamyzdan qalǵan dástúrdi úzbeı jalǵastyryp keledi. Mine, bıyl úshinshi jyl qatarynan partııanyń qoldaýymen «Uly dala joryǵy» báıge-marafony ótti. Bul is-sharanyń ulttyq sport­ty órkendetýmen qatar etnotýrızmniń damýyna, baýyrlas elderdiń mádenı murasyn nasıhattaýǵa tıgizer paıdasy orasan», dedi D.Káribek.

Sonymen, 5 kúnge sozylǵan 500 shaqyrymdyq joryqta Qabardın-Balqar komandasy (ýaqyt: 27:58:23) jeńiske jetti. Olardyń izin ala máreden ótken Almaty qalasynyń «Alataý» quramasyna (ýaqyty: 28:04:40) 2-oryn buıyrdy. Úshtikti Aq­tóbe ob­lysynyń komandasy (28:26:57) túıindedi. Tórtinshi oryn Jetisý oblysynyń sportshylaryna (29:39:20), al besinshi oryn Mańǵystaý oblysynyń (29:43:40) qyzdary jasaqtaǵan «Sýyn» komandasyna buıyrdy.

Ulttyq sport túrleri qaýym­dastyǵynyń prezıdenti Islam­bek Sal­janov dástúrli túrde ótkizilip kele jatqan aıtýly is-shara respýblıkalyq báıge-ma­rafonnyń jyldan-jylǵa deńgeıi ósip, qatysýshy komandalardyń da sany artqanyn atap ótti.

«Memleket basshysy Qasym-Jomart Toqaevtyń qoldaýymen ulttyq sport qarqyndy túrde damyp keledi. Elorda tórinde Dú­nıe­júzilik kóshpeliler oıyn­darynyń bastalǵanyn áıgileıtin «Uly dala joryǵy» halyq­aralyq báıge-ma­rafony máresine jetti. Bul joryqqa eli­mizdiń tańdaýly komandalarymen qatar álemniń ár qıyrynan da shabandozdar qatysty. Bul biregeı báıge-marafon tórtkúl dúnıege qazaq jerinde bastaý alǵan kóshpelilerdiń baı mádenıetin kórsetti», dedi I.Saljanov.

Bıylǵy halyqaralyq báıge-mara­fonda rekordtyq kórsetkish te tirkeldi. Máselen, Qyrǵyzstan quramasy jarys jolynan shyǵyp qalǵanymen, alǵashqy kezeńde 100 shaqyrymdy 5 saǵat 12 mınýt 23 sekýndta shaýyp ótti.

Jalpy, 17 komanda qatysyp, elimiz­diń shabandozdary Adaı, Áýlıeata, Naıman, Jetisý, Qos­tanaı jáne Kóshim tuqymynyń sáıgúlikterin synap kórdi. Jetisý, Mańǵystaý (qyzdar), Mańǵystaý (erler), Shyǵys Qazaqstan, Aqtóbe, Qostanaı, Aqmola (qyzdar), Jam­byl oblystarynyń jáne Al­maty qalasynyń komanda mú­sheleri Túrkııa, Majarstan, Iran, Ońtústik Afrıka Respýb­lı­kasy, Qyrǵyzstan, Reseı Fede­rasııasynyń quramyna kiretin Tatarstan, Qabardın-Balqar, Qarashaı-Sherkes respýblıkalarynan qosylǵan shabandozdarmen tartysqa tústi.

Almaty qalasynyń «Alataý» komandasy sapynda halyqaralyq báıge-marafonǵa qatysyp, júl­deli bolǵan shabandoz Ersin Alǵaz­yuly attarynyń tasyrqap, sońǵy kezeńde ýaqyttan utylǵanyn aıtty.

«Almaty qalasynan bes shabandoz qosyldyq. Alǵashqy úsh kezeńde bes atymyz da tyń bol­ǵan edi. Tórtinshi kezeńde bir at tastaq jolda tuıaǵyn aldy­ryp, jarystan shyǵyp qaldy. Qory­­tyndy kezeńde ekinshi atymyz da tasyrqap, márege úsh shabandoz ǵana keldi. Biz taktıkalyq turǵyda qatelik jiberdik. О́ıtkeni alǵashqy kezeńderde qyrǵyz komandasyn ókshelep qýamyz dep at­tarymyzdyń kúshin sarqyp aldyq. Chempıondyq ataq buıyrmaı tur eken, dese de 2-oryn da – az tabys emes. Mundaı báıge-marafon jal­ǵasyn tapsa, ár óńirden kúnshilik jolǵa shydas beretin qazanattar kóptep shyǵar edi», dedi shabandoz.