Qosshy qalalyq soty adam densaýlyǵyna abaısyzda aýyr zııan keltirýge ákep soqqan, nemquraıdylyq saldarynan kásibı mindetterin tıisinshe oryndamaǵany úshin «103» qyzmeti boıynsha shaqyrýlardy qabyldaıtyn feldsherge qatysty qylmystyq isti qarady, dep habarlaıdy Egemen.kz Aqmola oblystyq sotynyń baspasóz qyzmetine silteme jasap.
Oblystyq sottyń habarlaýynsha, «103» qyzmetiniń dıspetcheri pasıent «Ý.»-dan shaqyrýdy qabyldap, «arterııalyq gıpertenzııamen esepte turǵan, keýdede aýyrsyný, jedeldiktiń 1-sanatyndaǵy shaqyrý» habarlamasymen ony Qosshy qalasyna joldaǵan.
«Qosshyda feldsher «S.» shaqyrýdy qabyldaı otyryp, 1-shi sanattan 4-shi sanatqa aýystyrǵan, pasıenttiń shaǵymyn burmalap «joǵary temperatýra, 1 aptadan astam aýyrady, qatty jótel» dep kórsetip, emhanaǵa joldaǵan. Emhananyń feldsheri «A.» pasıent «Ý.»-ǵa 4-shi sanat boıynsha medısınalyq kómek retinde tekseris júrgizip, ıneksııa jasap ketken. «Ý.» medısınalyq kómekke qanaǵattandyrylmaı Astana qalasynyń aýrýhanasyna óz betinshe barýǵa májbúr boldy. Aýrýhanada oǵan «Júrektiń ıshemııalyq aýrýy. Mıokard ınfarktisi. Stentteý. Kardıogendi shok. Klınıkalyq ólimnen keıingi jaǵdaı» dıagnozy qoıyldy», delingen habarlamada.
Sotta «S.»-tiń kinási saraptamalardyń qorytyndylarymen, jábirlenýshi men kýágerlerdiń aıǵaqtarymen, feldsherge shaqyrýdyń jedeldigi sanatyn ózgertýge tyıym salatyn normatıvtik quqyqtyq aktilermen jáne istiń basqa materıaldarymen rastalǵan.
Jaza taǵaıyndaýda sot abaısyzda jasalǵan aýyrlyǵy az qylmystyń jasalǵanyn, sottalýshynyń júktiligi (22 aptadan astam merzimde) bolýy jeńildetetin jaǵdaı retinde, aýyrlatatyn mán-jaılardyń bolmaýyn jáne buryn sottylyǵy joq ekenin eskergen.
Sot úkimimen «S.»-ǵa medısınalyq qyzmet kórsetý quqyǵyn aıyra otyryp, probasııalyq baqylaý belgilenip 1 jyl 6 aıǵa bas bostandyǵyn shekteý taǵaıyndalǵan.
Sonymen qatar sot oblystyq densaýlyq saqtaý basqarmasy atyna tıisti sharalar qabyldaý úshin jeke qaýly shyǵarǵan. Jeke qaýlymen sot jedel medısınalyq járdem qyzmetkerleriniń abaısyzda pasıenttiń densaýlyǵyna aýyr zııan keltiretin medısına salasyndaǵy normatıvtik quqyqtyq aktilerdi óreskel buzýshylyǵyna nazar aýdarǵan.
Sondaı-aq sot úkimdi oblystyq jedel medısınalyq járdem stansııasy, Aqmola qosalqy stansııasy jáne Qosshy qalasynyń emhanasy qyzmetkerleri ujymdarynyń qatysýymen jarııa etken.
Sot aktileri zańdy kúshine engen joq.