Astyqty óńirdegi ilkimdi ister

Kásiporyn jumysyna oń baǵa berdi

Prezıdent áýeli Qostanaıdyń ındýst­rııalyq aımaǵynda ornalas­qan «KamLitKZ» jaýapkershiligi shek­teý­li seriktestiginiń shoıyn quıý zaýyty­na bardy. Memleket basshysy mun­daǵy júk kólikterine arnalǵan qosal­qy bólshek óndirisimen tanysty. Serik­testiktiń bas dırektory Dmı­trıı Gýrtovoıdyń aıtýynsha, zaýyt jylyna 45 myń tonna shoıyn quı­masyn shyǵarady. Quny 78,2 mlrd teńge bolatyn jobany iske asyrý nátıjesinde 500 jumys orny ashylǵan.

Kásiporyn basshysy Prezıdentke jobany júzege asyrýǵa Qazaqstan ınjenerleri men tehnologteri atsalysyp jatqanyn baıandady. Zaýytqa álemdik deńgeıdegi tájirıbeli ınjınırıng kompanııalarynyń sarapshylary men eýropalyq mashına jasaýshylar da tartylǵan.

Prezıdentke shoıyn qorytý, ony qalypqa quıý, sondaı-aq óńdeý sekildi jumystardyń tolyq úderisi kórsetildi. Zaýyt barlyq zamanaýı talapqa saı keledi. Avtomattandyrý jáne energııalyq tıimdilik deńgeıi joǵary bolǵandyqtan, qorshaǵan ortaǵa áseri az. Qazir munda 30 robot bar. Olar anaǵurlym kúrdeli ári aýyr tehnologııalyq operasııalardy oryndaıdy.

Memleket basshysy ozyq tehnologııalarmen jabdyqtalǵan kásiporynǵa oń baǵa berdi. Budan soń zaýytta eńbek etetin otandyq jas ınjenerlermen áńgimelesti.

«Búginde biz jumysshy maman­dardy qoldap jatyrmyz. Ol jóninde Jol­daýymda da aıttym. Kelesi jyldy Jumysshy mamandyqtary jyly dep jarııaladyq. Eńbek qashan­da qundy. Bul jerde kil jas­tar jumys isteıdi eken. Biz iri jáne shaǵyn kásiporyndarda qyzmet etetin mamandardy, ásirese jas­tardy mindetti túrde qoldaımyz. Elimizde eńbek ótili 100, 200 jyldy quraıtyn, tipti odan da asatyn ju­mysshy áýletter barshylyq. Biz mun­daı otbasylarǵa, áýletterge qashan­da qurmet kórsetemiz. Sizder sekildi jastardyń ómir joly endi bastalyp jatyr. Elimizdiń damýyna zor úles qosatyn­dary­ńyzǵa senimdimin. Barshańyz­ǵa sáttilik tileımin», dedi Qasym-Jomart Toqaev.

Prezıdent jańa óndirilgen sı­lındr­ler blogine qoltańba qaldy­ryp, joba qatysýshylaryna otan­dyq mashına jasaý klasterin damy­týǵa úles qosqany úshin alǵys aıtty.

Qostanaı oblysynyń ákimi Qumar Aqsaqalov Memleket basshysyna óńirge ınvestısııa tartý máselesi jóninde, atap aıtqan­da, ındýstrııalyq sektordaǵy, agroónerkásip keshenindegi, metallýrgııa, mashına jasaý jáne logıs­tıka salalaryndaǵy jańa jobalar týraly baıandady.

Oblys ákiminiń aıtýynsha, atalǵan jobalardy iske asyrý barysynda jalpy óńirlik ónim kólemi eki ese ósip, jyl saıynǵy bıýdjet túsimi 75 mlrd teńgege ulǵaıady. Sondaı-aq ortasha jalaqy mólsheri 1,5 ese artyp, 20 myńǵa jýyq jańa jumys orny ashylady.

Avtoónerkásip salasynyń áleýeti joǵary

Memleket basshysy Qasym-Jomart Toqaev Qostanaı oblysyn­daǵy «KIA» avtomobılderin shyǵara­tyn zaýyttyń qurylys alańyna bardy. Zaýyt qurylysy byltyr qazan aıynda bastalǵan. Josparǵa sáıkes konveıerden alǵashqy kólik synaq rejiminde kelesi jyldyń shilde aıyn­da shyǵarylady.

«KIA» Qazaqstan» bas dırektory Kım De Kı Prezıdentke atalǵan zaýyttyń 2025 jyldyń qazan aıynda iske qosylatynyn aıtty. Avtokásiporyn bastapqy kezeńde «Sorento» modelin shyǵarýdy josparlap otyr. 2026 jyldyń qańtar aıynan bastap jańartylǵan «Sportage» modeli qurastyrylady.

Prezıdentke «KIA» zaýyty jylyna 70 myńǵa jýyq avtokólik shyǵara alatyny jóninde málimet berildi. Kásiporynda jańadan 1 500 turaqty jumys orny ashylady. Munda óndiristiń tıimdiligin arttyrýǵa ári ekologııalyq turǵydan zııansyz etýge baǵyttalǵan tehnologııa­lyq sheshimder qoldanylady. Avtomattandyrylǵan zamanaýı kásiporynnyń dánekerleý jelisinde, avtokólikti boıaý jáne qurastyrý jumystaryna 70 robot paıdalanylady. Jobanyń quny 200 mln dollardy quraıdy, onyń 80 paıyzǵa jýyǵy – tikeleı sheteldik ınvestısııa úlesinde.

Sonymen qatar Prezıdentke jańa zaýyttyń janynan qosalqy bólshekter óndirisiniń klasterin qurý jobasy tanystyryldy. Qazir munda «Lokalızasııa ortalyǵy» salynyp jatyr. Al «KIA» kompanııasy Lokalızasııalyq ortalyqqa avtokólik komponentteri men qosal­qy bólshekterdi óndirýshi jahandyq kompanııalardy tartý boıynsha jumys júrgizip jatyr.

«KSS Corporation» kompanııasy avtokólik komponentteri bóliminiń basqarýshysy Pak Seıon men «Seoyon Ehwa Global» kompanııasy jahandyq bıznesti basqarý tobynyń jetekshisi Chang Seokvon Ońtústik Koreıanyń óndirýshileri Qazaqstanda óz óndirisin ashýǵa ázir ekenin aıtty.

Memleket basshysy odan keıin «AgromashHoldıng KZ» aksıonerlik qoǵamynyń Lokalızasııa ortalyǵyn aralap kórdi. Kásiporyn dońǵalaqty aýylsharýashylyq tehnıkalary men jalpy mashına jasaý salasy úshin qosalqy bólshekter shyǵarady. Búginde munda 700 adam eńbek etedi. Zaýyt jylyna 250 myńǵa jýyq bólshek óndiredi. Jyl basynan beri zaýyttan 1 myńǵa jýyq traktor men 300 kombaın shyǵarylǵan.

Kásiporyn basshysy Prezı­dent­ke Lokalızasııa ortalyǵy­nyń «Claas» traktorlary men kombaındarynyń birqatar qosalqy bólshegin daıyndaýǵa tapsyrys alǵany jóninde baıandady. Buǵan qosa jýyrda aspaly jáne tirkemeli tehnıkalardy óndirýde álemde úzdik sanalatyn «Amazone» kompanııasymen kelisimshartqa qol qoıylǵan. Bıyl zaýytta dán sebý jáne búrký qondyrǵylarynyń óndirisi de iske qosylmaq.

Memleket basshysyna ortalyq qazirgi ýaqytta «KIA» kompanııa­symen birlesip, 2025 jyly iske qosy­latyn jańa zaýyttyń quramdas bólikterine arnalǵan jabdyqtardy shyǵarý jumystaryn bastaǵany týraly málimet berildi.

Qasym-Jomart Toqaev kásip­orynnyń eńbek ujymymen kez­des­ti. Zaýyt jumysshylary Pre­zı­denttiń Qazaqstan halqyna ar­naǵan Joldaýyn zor yqylaspen tyńdaǵanyn, ásirese jumysshy mamandardyń bedeli arta túsetinine erekshe qýanǵanyn jetkizdi. Mem­leket basshysy jumysshylarǵa óndiristegi jergilikti úlesti arttyrý, bilikti mamandar daıarlaý jáne aýyl sharýashylyǵy tehnıkalaryn jańartý qajet ekenin aıtty.

«Elimizde tozyǵy jetken tehnıkalar óte kóp. Keıbir mamandardyń aıtýynsha, ol 80 paıyzǵa deıin jetken. Qazaqstanda shyǵarylǵan tehnıkanyń esebinen barlyq parkti jańartatyn ýaqyt keldi. Qazir kolledjderde jumysshy mamandyqtar boıynsha bilim alǵan jastardyń óndiriske kelgeni qýantady», dedi Qasym-Jomart Toqaev.

О́z kezeginde zaýyt eńbekkerleri mashına jasaýshylardyń atynan Prezıdentke jumysshy mamandarǵa qoldaý kórsetkeni úshin alǵys aıtty.

Fermerlerdi qoldaý jalǵasady

Memleket basshysy Qostanaı aýdanynyń Maıkól aýyldyq okrýgin­degi «Nadejdınka» jaýapker­shiligi shekteýli seriktestiginde bolyp, aýyl sharýashylyǵy taýarlaryn óndirýshilermen kezdesti.

Qasym-Jomart Toqaevqa oblys ákimi óńirdegi aýyl sharýashylyǵyn damytý sharalary jóninde málimet berdi.

Qumar Aqsaqalovtyń baıanda­ýynsha, bıyl dıqandar 5 mıllıon gektar alqapqa egin ekken. Elıtalyq tuqymnyń úlesi men mıneraldy tyńaıtqyshtardy sebý kólemin ulǵaıtý, sondaı-aq mashına-traktor parkin jańartý arqyly egin sharýashylyǵy ónimdiligin arttyrý josparlanyp otyr.

Sondaı-aq Memleket basshysyna óńirde mal jáne qus sharýashy­lyǵy salalaryn damytý týraly baıandaldy. Atap aıtqanda, al­daǵy úsh jylda 14 taýarly sút fermasyna ınves­­tısııa tartylady. Mal sharýa­shyly­ǵyna arnalǵan 44 keshen jáne eki iri qus fabrıka­sy salynady. Atalǵan jobalar esebi­nen oblystaǵy sút jáne et ón­­dirý kólemi 1,4 ese, al qus eti óndi­­risi 5 ese kóbeıedi. Buǵan qosa bir­­qatar ın­ves­tısııalyq jobany júzege asy­rý nátıjesinde úsh jyl ishinde tereń óńdeletin ónimderdiń úlesin 70 pa­ıyzǵa deıin jetkizý mindeti qoıylǵan.

Prezıdent «Nadejdınka» JShS-nyń egis alqabyn aralap kórip, aýyl sharýashylyǵy eńbekkerlerimen áńgimelesti.

Memleket basshysy egindi ýaq­tyly jınap alý, eńbek ónimdi­ligin arttyrý jáne agrarlyq salaǵa jańa tehnologııalar engizý, aýyl sharýashylyǵy jerlerin maqsatqa saı paıdalaný mańyzdy ekenin atap ótti. Qasym-Jomart Toqaev memleket otandyq fermerlerdi qoldaýdy jalǵastyratynyn jáne tabysty jobalardy júzege asyrýǵa kómek kórsetetinin jetkizdi.

Daryndy balalarmen júzdesti

Memleket basshysy óńirge jumys sapary barysynda Qostanaı qalasyndaǵy deneshynyqtyrý-saýyqtyrý keshenin aralap kórdi. «Iýbıleınyı» shaǵyn aýdanynda ornalasqan sport nysany taıaýda ǵana paıdalanýǵa berilgen. Munda jergilikti turǵyndar sporttyń shaǵyn fýtbol, basketbol, voleıbol jáne ústel tennısi sııaqty túrlerimen emin-erkin aınalysa alady. Sondaı-aq ortalyqta jattyǵý jáne horeografııa zaldary jumys isteıdi. Erekshe qajettiligi bar jandarǵa tıisti jaǵdaı jasalǵan.

Qostanaı qalasynyń ákimi Marat Júndibaev Prezıdentke oblys orta­lyǵynda buqaralyq sportty damytý sharalary týraly málimet berdi. Onyń aıtýynsha, qala turǵyndaryna deneshynyqtyrý nysandarynyń qoljetimdiligin qamtamasyz etýge basa nazar aýdarylady.

Memleket basshysy keshendegi zaldardy aralap kórip, jergilik­ti turǵyndarmen jáne jas sportshylarmen áńgimelesti.

Qasym-Jomart Toqaev Qostanaı qalasyndaǵy balalarǵa arnalǵan «IQostanay smart» ortalyǵynyń qyz­metimen tanysty. Qazirgi ýaqytta munda eki myńǵa jýyq oqýshy qosymsha bilim alady. О́skeleń urpaqtyń ıgiligi úshin 24 úıirme jumys isteıdi. Oqýshylar saraıyn­da joǵary tehnologııalyq quraldarmen jabdyqtalǵan kıbersport, ınjenerııa, avıamodeldeý kabınetteri, jańartylatyn energııa kózderi, hımııa jáne fızıka-tehnıkalyq zerthanalary, sondaı-aq májilis, oqý jáne horeografııa zaldary bar. Ortalyqtaǵy robot tehnıkasy, ınjenerııa jáne avıamodeldeý úıirmelerine qatysatyn balalar Prezıdentke óz jobalaryn tanystyryp, vırtýaldy zerthanada tájirıbe jasap kórsetti.

«Bolashaqta óz bilim-bilikterińizdi iske asyrýǵa mol múmkindik bar dep oılaımyn. О́ıtkeni munyń bári qazirgi zamanda, ekonomıkada jáne basqa da salalarda suranysqa ıe. Biz ýaqyt talabyna saı tehnologııany meńgergen ultqa aınalýymyz qajet. Elimizge otandyq tehnologııany damytatyn sizder sekildi azamattar kerek», dedi Memleket basshysy.

Oqýshylar Prezıdentke tehnıka­lyq mamandyqtarǵa arnalǵan bilim granttaryn kóbeıtkeni úshin alǵys aıtty.

Qostanaı oblysy