Búgin, 12 qyrkúıek - qazaq kınosynyń kúni. Bul mereke 2005 jyldan beri toılanyp keledi, dep jazady Egemen.kz.
1941 jyly Qazaq KSR Halyq komıssarlary keńesiniń qaýlysymen Almaty kınostýdııasy qurylǵan edi.
1960 jyly kınostýdııa ataýy «Qazaqfılm» bolyp ózgertilse, 1984 jyly oǵan qazaq kınematografııasynyń kemeńger qaıratkeri Sháken Aımanovtyń esimi berilgen.
Qazaq kınosy kúnin atap ótýdi 2005 jyly Qazaqstan kınematografısteri odaǵynyń basshysy bolǵan Baýyrjan Nógerbekov usyndy. Sodan beri 12 qyrkúıekte «Qazaq kınosynyń kúni» jyl saıyn atalyp ótiledi.
«Búginde otandyq kıno salasy qarqyndy damyp jatyr. Salalyq zańnyń qabyldanýy, ulttyq kınony qoldaý ortalyǵynyń qurylýy, Qazaqstan bastamashy bolǵan kınofestıvalderdiń jańa sapalyq deńgeıge shyǵýy, qazaq fılmderiniń álemdik kınoforýmdarda moıyndalýy jáne joǵary marapattar alýy – munyń barlyǵy otandyq kınematograftyń úlken áleýetin kórsetedi», delingen Mádenıet jáne aqparat mınıstrliginiń habarlamasynda.