Qazaqstanda jyl saıyn adam saýdasyna qatysty 150-ge jýyq qylmystyq is qozǵalady, dep habarlaıdy Egemen.kz.
IIM Uıymdasqan qylmysqa qarsy kúres departamenti Úshinshi basqarmasy bastyǵynyń orynbasary Shynar Kósherbaevanyń aıtýynsha, IIM qurylymynda adam saýdasyna qarsy kúres bólimsheleri jumys isteıdi, jyl saıyn 150-ge jýyq qylmystyq is qozǵalady.
«Osy jyldyń ótken kezeńinde 134 qylmystyq is tirkeldi. Onyń ishinde: adam aǵzasynyń múshelerin saýdalaǵany úshin – 15 is; adamdy qanaý maqsatynda urlaǵany úshin – 2; qanaý maqsatynda zańsyz bas bostandyǵynan aıyrǵany úshin – 3; adam saýdasy úshin – 15; kámeletke tolmaǵandy jezókshelikpen aınalysýǵa tartqany úshin – 12; kámeletke tolmaǵandardy saýdalaǵany úshin – 3; jezókshelikpen aınalysýǵa tartqany úshin – 7; prıton uıymdastyrǵany jáne jeńgetaılyq jasaǵany úshin – 77», dedi spıker Sh.Kósherbaeva.