Kishkentaı Abdýlla 2024 jyly 11 mamyrda Aqtaý qalalyq balalar juqpaly aýrýlar aýrýhanasynda qaıtys bolǵan. Balanyń ata-anasy búldirshinniń dárigerlerdiń salǵyrttyǵynan qaıtys bolǵanyn alǵa tartady, dep habarlaıdy Egemen.kz Lada.kz saıtyna silteme jasap.
Bir jasar Abdýlla О́tegenniń qyzýy kúnde kóteriletin bolǵan. Balanyń ákesi Ermek Nurbaevtyń aıtýynsha, olardy aldymen ýchaskelik pedıatr qaraǵan, biraq dene qyzýy túspeı, balalar juqpaly aýrýlar aýrýhanasyna jiberilgen. Ol jerde dárigerler nárestede jedel respıratorlyq vırýstyq ınfeksııa bar dep boljap, qyzýyn túsirip, dári-dármek jazyp úıine qaıtarǵan.
«Emdeý nátıje bermedi jáne biz jeke ınfeksıonıstke júginýimizge týra keldi. Ol juqpaly aýrýlar aýrýhanasynyń qoıǵan dıagnozyn tekserip, emdeýdi jalǵastyrýdy usyndy. Alaıda balanyń qyzýy túspeı, qaıtadan juqpaly aýrýlar aýrýhanasyna bardyq. Jedel járdem jáne taksı arqyly qaıta kelgenimizge qaramastan, 18 sáýirge deıin aýrýhanaǵa jatqyzý júrgizilgen joq. Tórtinshi ret kelgende bizdi aýrýhana qabyldady, biraq bul demalys kúni bolǵan edi. Bizge qaıtadan JRVI dıagnozy qoıyldy. Bir aptadan keıin ǵana dıagnoz pnevmonııa men sıtomegalovırýsqa ózgertildi», dedi balanyń ákesi Ermek Nurbaev.
Ermek Nurbaev balasynyń aýrýhanada qyzylshamen aýyrǵanyn, bul oǵan qosymsha aýyrtpalyq bolǵanyn aıta ketti.
«9 mamyr kúni tańerteń ulymnyń jaǵdaıy nasharlap, 10 mamyr kúni tańerteń ol ózdiginen tynys ala almaı, jansaqtaý bólimine jatqyzyldy. 11 mamyrda júregi toqtap qaldy. Buryn tamaq iship, júrip-turǵan bala juqpaly aýrýlar aýrýhanasynda emdelgennen keıin jatyp qaldy. Qorytyndyda ólim sepsısten bolǵany kórsetilgen. Biz dárigerlerge ulymyzdyń ómiri men densaýlyǵyn amanattadyq, biraq olardyń salǵyrttyǵy men qateligi bizdi balamyzdan aıyrdy», dedi Ermek Nurbaev.
Balanyń ákesiniń aıtýynsha, ulynyń ólimine qatysty isti qaraýdy ótinip, Prezıdent Ákimshiligine, Densaýlyq saqtaý mınıstrligine jáne Bas prokýratýraǵa aryz jazǵan.
«Bas prokýratýra ótinishti qarap, ony odan ári qaraý úshin Ishki ister mınıstrligine jiberdi. О́z kezeginde IIM ótinishti qarap, tergeý júrgizý úshin Mańǵystaý oblysynyń polısııa departamentine joldady. Oblystyq polısııa departamenti Qylmystyq is júrgizý kodeksiniń 179-babynyń 1-bóliginiń 1-tarmaǵyna sáıkes, aryzdy qaraýsyz qaldyrǵan, alaıda, aryzdy IIM-ne qaıta joldaý kezinde qaraý qajet ekendigi kórsetilgen. О́tinishti jáne ony tıisti derekter bazasynda tirkeýge, sondaı-aq zańnamaǵa sáıkes tekserý júrgizýge mindettenedi, alaıda oblystyq polısııa departamenti tergeý júrgizý qajettiligi týraly ótinishpen tolyq tanyspaı, aryzdy qaraýdy aıaqtady», dedi marqumnyń ákesi.
Ermek Nurbaev balanyń qaıtys bolý faktisi boıynsha Mańǵystaý oblysynyń Densaýlyq saqtaý basqarmasy tekserý júrgizgenin, alaıda onyń aıtýynsha, birneshe dáriger men oblystyq balalar aýrýhanasynyń dırektory balanyń qaıtys bolýyna qaramastan, jumysqa nemquraıly qaraǵany jáne zańnamany saqtamaǵany úshin sógis túrinde tártiptik jazamen ǵana jazalanǵanyn habarlady.
Oblystyq densaýlyq saqtaý basqarmasy bul jaǵdaıda bala elimizde qabyldanǵan dıagnostıkalyq jáne emdeý hattamalary boıynsha tolyq emdelgenin málimdegen.
«Respýblıkalyq ortalyqtarmen telemedısına seanstary júrgizildi, emi túzetildi. Aýrý tarıhyna densaýlyq saqtaý basqarmasy da, Mańǵystaý oblysy boıynsha emdeý sapasyn baqylaý komıteti de taldaý jasady. Barlyq qorytyndy zańdy ókilderge tapsyryldy. Sol kezdegi emdeýshi dáriger ınspeksııadan ótip, qazir dekrettik demalysta», dedi Mańǵystaý oblysy densaýlyq saqtaý basqarmasynyń medısınalyq kómekti úılestirý jáne ana men bala densaýlyǵyn qorǵaý jónindegi orynbasary Asqar Mahmutov.
Oblystyq polısııa medısına qyzmetkeriniń kásibı mindetterin tıisinshe oryndamaýy boıynsha sotqa deıingi tergeý bastalǵanyn málimdedi.
«Polısııa qajetti tergeý áreketterin júrgizip jatyr, basqa aqparat tergeý múddesi úshin jarııalanbaıdy», dep qorytyndylady departament ókilderi.