Úkimet bólgen qarajatty dimkás jandardyń qajetine jumsaýdyń ornyna óz qaltasynan shyǵarǵandaı «únemdep» qalýǵa tyrysatyn sheneýnikter oblysta joq emes. Onsyz da taǵdyrdyń aýyr taýqymetin jastaıynan tartyp, jyǵylǵan ústine judyryq sııaqty ómirdiń aýyr azabyn arqalap kele jatqan qıyn da qıly jan azaby olardy túk oılandyrmaǵan tárizdi. Adamgershilik asyl qasıettermen úsh qaınasa sorpasy qosylmaıtyn mundaı bassyzdyq áreketter prokýratýra tarapynan áshkerelenbegende «jany ashymastyń qasyndaǵy basy aýyrmas» qylyq áli de jalǵasa bereri kádik edi.
Oblystyq prokýratýranyń qoǵamdyq keńes otyrysynda keltirilgen málimetterge súıensek, múgedekterge «músirkeı» qaraýshylyq aýdandarda jappaı sıpat alǵanyn baıqaý qıyn emes. Soǵan qaraǵanda, tıisti mekemeler tarapynan baqylaý-tártiptiń bosańsyǵany ma, álde memleket qazynasyn «qaǵýdyń» bir qıturqy joly ma degen oıǵa eriksiz kelesiń.
Máselen, Esil aýdanynyń turǵyny K.Bekqojın ekinshi toptaǵy múgedek retinde bir jyl boıy tıesili 12 arnaıy gıgıenalyq quraldyń ornyna 2-ýin ǵana alǵan. Bir ǵajaby, aýdandaǵy múgedekterdiń kópshiligi densaýlyqqa aýadaı qajetti osyndaı medısınalyq preparattarmen qamtamasyz etilmegen. M.Jumabaev aýdanynda óńirdegi dimkás jandardyń tórtten biri turatynyna qaramastan joǵarydaǵydaı faktilerdiń tirkelgenin bylaı qoıaıyq, sanatorıı-kýrorttyq em-domdarǵa qatysty jeńildikterden qaǵylǵany tańdandyrmaı qoımaıdy. Al Taıynsha aýdanynyń laýazymdy tulǵalary tirek-qımyl músheleri zaqymdanǵan jáne kózi nashar kóretin ǵarip adamdarǵa tıflotehnıkalyq quraldardy ýaqtyly jetkizbeýine esh ókinbeıtin sııaqty. О́ıtkeni, mundaı jaǵymsyz jaıttar birneshe márte oryn alǵan.
«Bir apamnan bir apam soraqy» degendeı, Shal aqyn aýdany sheneýnikteriniń myna kózboıaýshylyǵy aıdy aspannan bir-aq shyǵarǵandaı áser qaldyrady. Kórý qabileti nashar G.Kosteleova degen múgedekke arnaıy qolsaǵat berilipti. Tipti, alǵany jóninde qol da qoıǵan kórinedi. Al tekseris barysynda qolsaǵat aýdandyq jumyspen qamtý bólimi basshysynyń seıfinen sopań etip shyǵa kelgen. Bir aýdannyń ortan qoldaı bir mamany júrmek túgil ornynan ázer qozǵalatyn múgedekti kýrerlik jumysqa «ornalastyryp», «saqalshy-saqalshy degenge óz saqalyn boıaıdynyń» kerin keltirip tynǵan.
Mine, osyndaı derekterge qarap-aq múddeli vedomostvolar men olardyń qaraýyndaǵy qyzmetkerlerdiń óz mindetterine qalaı qaraıtynyn baǵamdaı berýge bolady.
Jaqynda quzyrly organdar taǵy bir basshynyń jalǵandy jalpaǵynan basyp kelgen adymyn ashtyrmady. Sóıtse, ol júıke aýrýyna shaldyqqan balalar dıspanserine jetekshilik etken tusta jórgekqaptardy 3-4 ese artyq baǵaǵa puldap, 3 mıllıon teńgeniń kózine sý quıǵan. Tyqyr taıanǵanyn sezisimen tabanyn jaltyratqan.
О́mir ESQALI,
«Egemen Qazaqstan».
Soltústik Qazaqstan oblysy.