Almaty qalasynda Ramazan Súleımenov atyndaǵy Shyǵystaný ınstıtýty jáne Islam Yntymaqtastyǵy Uıymy (OIS) janyndaǵy Islam tarıhy, óneri men mádenıetin zertteý ortalyǵy (IRCICA) Aqtóbe oblysynyń mádenıet, arhıvter jáne qujattama basqarmasynyń qoldaýymen «Altyn Orda jáne onyń muragerleriniń arabjazýly epıgrafıkasy» atty halyqaralyq ǵylymı semınar ótti, dep habarlaıdy Egemen.kz.
Ǵylymı semınar qazaq, orys jáne aǵylshyn tilderinde ótti. Jıynda tuńǵysh ret tarıhı Altyn Orda keńistigine qatysty birneshe memleket ǵalymdary bas qosty. Sóıtip, ulanǵaıyr aýmaqta saqtalǵan arabjazýly epıgrafıkalyq eskertkishterdiń ortaq tamyry, uqsastyǵy men erekshelikteri, olardy zertteý men saqtaý máselesi kóterildi. Bul jıyn «Altyn Ordadan keıingi qoǵamnyń dástúri men mádenıetindegi sabaqtastyq pen ózgerister (Batys Qazaqstan, Edil-Oral, Daǵystan, Horezm aımaqtaryndaǵy epıgrafıkalyq eskertkishterdi salystyrmaly zertteý)» atty jobany júzege asyrýda atqarylyp jatqan basty is-sharanyń birine aınaldy.
Semınar barysynda Altyn Orda órkenıeti ornalasqan tarıhı aımaqtardyń epıgrafıkasy, jańadan tabylǵan oljalar men olardyń ınterpretasııasy jaıly tyń málimetter aıtyldy. Bir qýantatyn jaǵdaı – Qazaqstannyń epıgrafıkalyq eskertkishterin kórshiles memleketterdegi arabjazýly jádigerlermen salystyrmaly zertteý qolǵa alynǵan eken. Bul Altyn Orda órkenıeti áser etken tarıhı aımaqtardyń damý jolyn, mádenı dástúrlerdiń tamyry ortaq ekendigin kórsetetin kórneki jumys bolady deıdi zertteýshiler.
Ǵylymı semınarǵa shyǵys epıgrafııasyn zertteýshi jetekshi otandyq jine sheteldik maman-ǵalymdar qatysty. Olardyń arasynda Stambýldan Islam yntymaqtastyǵy Uıymy janyndaǵy IRCICA ortalyǵy bas dırektordyń keńesshisi, tarıh ǵylymdarynyń doktory, professor Áshirbek Múmınov, Máskeýden Reseı Ǵylym akademııasy Reseı tarıhy ınstıtýtynyń aǵa ǵylymı qyzmetkeri, tarıh ǵylymdarynyń doktory, professor Ilıa Zaısev, Sh.Sh. Ýálıhanov atyndaǵy Tarıh jáne etnologııa ınstıtýty, Qazaq eskertkishtanýy boıynsha ortalyqtyń basshysy, tarıh ǵylymdarynyń doktory, professor Serik Ájiǵalı, О́zbekstan Ǵylym akademııasy Ulttyq arheologııa ortalyǵynyń bas ǵylymı qyzmetkeri, tarıh ǵylymdarynyń doktory, professor Bahtııar Babadjanov, Túrkııanyń Ahı Evran Kyrshehır ýnıversıteti Túrik tili fakýltetiniń dosenti, fılologııa ǵylymdarynyń kandıdaty Osman Qabadaıy, taǵy basqalary bar.
Semınar barysynda Ramazan Súleımenov atyndaǵy Shyǵystaný ınstıtýtynyń dırektory, professor Dúken Másimhanuly QR Ǵylym jáne bilim mınıstrliginiń qaýlysymen belgili shyǵystanýshy ǵalym Áshirbek Qurbanuly «Ǵylymdy damytýǵa sińirgen eńbegi úshin» arnaıy tós belgisimen marapattalǵanyn habarlap, ǵalymǵa kópshilik aldynda tabys etti.
Jıyn kezinde Shyǵystaný ınstıtýty qyzmetkerleri jaryqqa shyǵarǵan «Abat-Baıtaq» qorymynyń arabjazýly epıgrafıkalyq eskertkishteri» jáne «Máshhúr Júsip Kópeıuly. «Rısala-ıı janaıız (Janaza kitaby)» kitaptarynyń tusaýkeseri ótti.
Semınar meımandary men qatysýshylary Ramazan Súleımenov atyndaǵy Shyǵystaný ınstıtýtynyń dırektory, professor Dúken Másimhanuly qol qoıǵan sertıfıkatqa ıe boldy.
Ǵylymı semınardyń tolyq esebi men jıynda kóterilgen mańyzdy máseleler jaıly keńeıtilgen maqala taıaýda gazetimizdiń betinde jarııalanatyn bolady.
Almaty