Atyraý qalasynyń mańynda birneshe eldi meken bar. Jergilikti turǵyn Baǵytjan Dosanov Keńózek, Alǵabas aýyldarynyń kóshelerinde ósken aram shópti «tankpen» shaýyp júr.
Bul tehnıka 15-20 adamnyń jumysyn atqarady. Tehnıka áskerı tank úlgisinde jasalǵan. Jańalyqqa jany qumar jigitte Qytaıda shyǵarylǵan tehnıkanyń ekeýi bar.
«Birneshe jyldan beri jeke kásippen aınalysyp júrmin. Bıyl Atyraý qalasynyń mańyndaǵy Keńózek, Alǵabas eldi mekeniniń kóshesinde ósken aram shópti shabý konkýrsyna qatysqan edim. Bul isti atqarý úshin birneshe adamdy jumysqa tarttym. Jumysshylar aramshópti trımmer apparatymen shapty. Biraq aptap ystyqta aramshópti shabý ońaı emes. Oǵan qosa turaqty isteıtin jumysshylardy tabý qıyn. Osyndaı sebeppen, ınternetten shóp shabatyn tehnıkany izdestirdim. Sondaı eki tehnıkany Qytaıǵa baryp, satyp alyp keldim», deıdi Baǵytjan Dosanov.
Onyń aıtýyna qaraǵanda, «tankte» 200 attyń kúshi bar. Al salmaǵy – 400 kılo.
«Bul tehnıkamen kez kelgen shópti shabýǵa bolady. Tehnıka pýltpen basqarylady. Sol sebepten, 50-60 metr qashyqtan basqarý múmkindigi bar. Shynjyr tabandy «tank» jol talǵamaıdy. Sý aıdyndarynyń jaǵasynan da, batpaqta jerden de shóp shabýǵa bolady. Tehnıkanyń barlyq áreketi pýltpen retteledi», deıdi ol.
Bir ereksheligi, «tank» shabylǵan shópti ýatyp jiberedi. Al qysta jaıaý adamǵa arnalǵan joldyń qaryn kúreýge bolady. Shóp shapqanda, ne qar kúregende benzın quıady. Bir kósheden ekinshisine jetkizý úshin akkýmýlıator qoldanady. Aldaǵy ýaqytta jumys aýqymy kóbeıse, taǵy osyndaı tehnıkanyń birnesheýin satyp ákelýdi kózdep otyr.
Atyraý oblysy