Tabıǵat pen óner – egiz. Kez kelgen ónerdiń basy tumsa dalanyń ásemdiginen, tańǵajaıyp tabıǵatynan bastaý alady. Al jurt baıqaı bermeıtin árbir sáýleli sátti fotoǵa túsirý ózgeshe qabiletti qajet etetini de daýsyz.
L.N.Gýmılev atyndaǵy Eýrazııa ulttyq ýnıversıteti jýyrda Aqmola oblysy Zerendi kentinde ornalasqan «Tumar» oqý-saýyqtyrý kesheninde «Zerendi Photo Fest II» atty fototilshiler festıvalin ótkizdi.
Dástúrli is-shara L.N.Gýmılev atyndaǵy Eýrazııa ulttyq ýnıversıetiniń rektory Erlan Sydyqovtyń bastamasymen, osy oqý ordasy baspasóz qyzmetiniń, sondaı-aq Jýrnalıstıka jáne áleýmettik ǵylymdar fakýltetiniń uıymdastyrýymen ótti.
Is-sharaǵa memlekettik organdarda, buqaralyq aqparat quraldarynda qyzmet etetin fototilshiler, sondaı-aq EUÝ-da jýrnalıstıka mamandyǵy boıynsha oqyp júrgen stýdentter qatysty.
Baıqaý barysynda elordalyq jáne halyqaralyq BAQ, memlekettik organdardyń fototilshileri eki kún boıy stýdentterge túrli janrda sýretke túsirý tehnıkasyn úıretip, sheberlikti shyńdaý dáristerin ótkizdi. Olardyń ishinde Premer-mınıstrdiń fototilshisi Baýyrjan Jýasbaev, «Egemen Qazaqstan» gazetiniń fototilshisi Erlan Omar, «Astana aqshamy» gazetiniń fototilshisi Sultan Seıit, ózge de fotoóner has sheberleriniń is-tájirıbesi stýdentterge tálimi mol taǵylymdama boldy.
Fotosheberlerdiń árqaısysy janyna birneshe stýdentti ertip júrip, qıly janrda fotoǵa túsirýdiń ádis-tásilderin úıretti. Nátıjesinde, jeke fototilshiniń ǵana emes, onyń tutas komandasynyń túsirgen sýretteri baǵalandy. Solaısha, qatysýshylar «Úzdik fototilshi», «Úzdik kompozısııa», «Úzdik fotoportret», «Úzdik fotoreportaj», «Úzdik fotopeızaj», «Úzdik rakýrs» atalymdarymen marapattaldy. Is-sharada stýdentterdiń sheberligin arttyryp qana qoımaı, olardy qanattandyryp, ynta-jigerin arttyrýǵa da jol ashyldy.
Ýnıversıtettiń Jýrnalıstıka jáne áleýmettik ǵylymdar fakýltetiniń dekany Qaırat Saq qatysýshylardy arnaıy dıplommen marapattap, syı-sııapat jasady. Sonymen birge elimizdiń aqparat salasynda uzaq jyl eńbek etip, erekshe iz qaldyrǵan fotoóner sańlaǵy Sovetbek Maǵzumov fotofestıvalǵa arnaıy qonaq retinde shaqyryldy. Zeınetke shyqsa da, súıikti kásibinen qol úze qoımaǵan ardager:
– Osy festıvalǵa shaqyrǵandaryńyz úshin ýnıversıtet ujymyna, áriptesterime alǵysymdy bildiremin. Biz jastarǵa bilgenimizdi úıretýge qashan da daıynbyz,– dep aǵynan jaryldy.
Baıqaýdyń bas júldesin Sovetbek Maǵzumov jetekshilik etken Altynaı Ábdish, Dilnaz Qýanyshbekova, Gúlsheker Súleımenova syndy stýdentterden jasaqtalǵan top jeńip aldy. Tań alageýimde jetekshilerimen birge Zerendi ólkesinde arqan boıy kóterilgen qyzylshaqa kúnniń araıly sátin fotomen órnektegen toptyń eńbegin qazylar alqasy joǵary baǵalady.
«Zerendi Photo Fest» festıvali aldaǵy ýaqytta da jalǵasyn tabady.