Senat Tóraǵasy Máýlen Áshimbaev bastaǵan AES salýdy qoldaý jónindegi halyq shtabynyń músheleri Abaı oblysyna kelip, aýylsharýashylyq ónimderin óndirýshilermen, bilim berý salasynyń mamandarymen jáne kommýnaldyq qyzmetter salasyndaǵy eńbek ujymdarymen kezdesti, dep habarlaıdy Egemen.kz.
Senattyń baspasóz qyzmetiniń málim etýinshe shtab músheleri «Prırechnoe agrofırmasy» JShS-nyń bazasynda oblystaǵy aýylsharýashylyq ónimderin óndirýshilermen júzdesti. Odan bólek, «Eıkos» JShS-nyń kásipkerlerimen jáne qyzmetkerlerimen, sondaı-aq, kommýnaldyq sektor kásiporyndarynyń ujymdarymen kezdesýler barysynda qatysýshylar elimizde qalyptasqan ekologııalyq túıtkilder men energııa tapshylyǵyna qatysty máseleni júıeli sheshý qajet ekenin aıtty.
«Prezıdentimiz Joldaýda atap ótkendeı, 6 qazanda Qazaqstanda AES salý máselesine qatysty respýblıkalyq referendým ótedi. Búginde búkil álem klımattyń ózgerýine baılanysty qıyndyqtarǵa tap bolyp otyr. Kún saıyn aýa-raıy ózgerip jatyr. Qorshaǵan ortanyń ahýalyn da bárimiz kórip otyrmyz. Bıyl Qazaqstanda bolǵan alapat sý tasqyny da sondaı ózgeristerdiń saldary. Mundaı jaǵdaıda ekologııaǵa tıgizetin zalaldy azaıtatyn jáne energııaǵa zııan keltirmeıtin tıimdi sheshimder qajet», dedi Máýlen Áshimbaev.
Sonymen qatar kezdesýler barysynda ekologııalyq qaýipsizdik máselesin sheshý keshendi tásildi jáne múddeli taraptardyń qatysýyn talap etetini atap ótildi. О́ıtkeni atalǵan sala barlyq mańyzdy baǵytpen tyǵyz baılanysty. Osy oraıda ǵylymǵa baǵdarlanǵan tásilge jáne qazirgi álemdik tájirıbeni zerdeleýge erekshe nazar aýdarǵan jón. Atap aıtqanda, bul iste jańa tehnologııalardy zerdeleý jáne óndiriske ınnovasııany engizý qajet. Muhtar Áýezov atyndaǵy pedagogıkalyq kolledjde ótken kezdesýde bilim berý salasynyń ókilderi atalǵan ustanymdy qoldaıtyndaryn bildirdi.