Jalyndaǵan jastyq pen alaýlaǵan shynaıy sezimniń ordasyndaı bolǵan elimizdiń bas bilim oshaǵynyń aýmaǵyndaǵy erekshe saltanat kún sáýlesi shapaǵyn shashqan sátten bastaldy. Stýdent jastardyń urandaǵan jigerli daýysy aınalaǵa aıbar bergen Alataýdyń etegin dýmandatyp, tóńirekti dúbirge bóledi.
– Alǵa, Qazaqstan! Alǵa, Qazaqstan! Alǵa, Qazaqstan!
Jastar daýysy men jigerli mýzyka bir sátke tynys alǵanda búginginiń samuryǵy – sulý suńqardyń sımvolyndaı qalyqtap jerdegi dýmandy tóbeden túsirgen drondardyń pyryldaǵan daýysy estildi…
Kóp keshikpeı dýmandy jurt aldyna Almaty qalasynyń ákimi Baýyrjan Baıbek shyǵyp sóz bastady.
– Qazaqtyń ejelgi túsinigindegi Ot kıesi, Ot-Ana barsha jaqsylyq pen izgiliktiń bastaýy bolsa kerek-ti. Halqymyz erekshe mán bergen eń qasterli, eń qasıetti Otan, otbasy degen uǵym da osy «ot» túbirinen shyqqan. Dúnıe júzindegi aýqymdy doda Elbasymyz – Qazaqstannyń Tuńǵysh Prezıdenti Nursultan Nazarbaevtyń qoldaýymen qa-sıetti qazaq jerinde, Almaty qalasynda tuńǵysh ret ótip otyrýy álem jurtshylyǵynyń elge qurmeti, Qazaqstan Respýblıkasynyń jasampaz halqy men onyń Elbasy Nursultan Nazarbaevqa arnalǵan erekshe senimi, – dep atap ótti qala ákimi.
Almatydaǵy Ýnıversıada alaýyn tutatý qazaq biliminiń qarashańyraǵy ál-Farabı atyndaǵy Ulttyq ýnıversıtette ótýi de tekten-tek emes. Bul irgeli oqý orny elimizge tanymal qansha sport sańlaqtaryn tárbıelep shyqty.
…Búgingi ǵajaıyp tehnologııalyq jetistikterdi júzege asyrýmen jalyn atqan ǵalamat ot-oshaqtan alaý tutatqan ýnıversıtettiń úzdik stýdenti Aısulý Ernııazova Almatyda alǵash jaǵylǵan jarys alaýyn alyp kelip, qala ákimi Baýyrjan Baıbekke tabystady.
Saltanat bastaldy.
Dýmandy mýzyka men dýyldaǵan stýdent jastardyń qoshemetimen Tımırıazev kóshesine bet alǵan alaý ustaǵan qala ákimi Baýyrjan Baıbekti jarys jolyndaǵy 2-shi estafeta núktesinde ótken jylǵy Rıo-de-Janeıro-2016 Olımpıadasynyń sýda júzýden chempıony, ál-Farabı atyndaǵy Qaz UÝ stýdenti Dmıtrıı Balandın tosyp turǵan. El senimin aqtaǵan Dmıtrıı Balandındi qaýmalap, jelep-jebegen jelaıaq top sol qanatqa burylyp, Manas kóshesine qaraı jol tartty. 3-shi estafeta núktesinde kúlli Azııa qurlyǵy jastaryn sánimen, symbatymen ǵana emes, voleıbol sportyndaǵy asqan sheber oıyndarymen tań qaldyryp, tamsandyrǵan ataqty sportshy qyzymyz Sabına Altynbekova kútip turǵan bolatyn.
Sabınadan estafeta alaýyn qalalyq máslıhattyń depýtaty Murat Ádilhanov alyp, belgili qashyqtyqty júgirip ótken boıda alaýdy Respýblıkalyq sport kolledjiniń dırektory, pedagogıka ǵylymdarynyń doktory Amalbek Tshanovqa berdi…
Osylaısha, Manas kóshesimen tip-tike jol tartqan alaý estafetasy Abaı dańǵylyna bet aldy.
Abaı dańǵylyna túsip ot-alaýdy qoldan qolǵa ótkizip alǵa jyljyǵan top Ýnıversıadanyń jarys ótkizetin basty alańdarynyń biri – Balýan Sholaq atyndaǵy sport keshenine jaqyndaı tústi. Osy eki arada tek Almatyǵa ǵana emes, kúlli Qazaqstanǵa esimderi tanymal bir top azamat estafeta alaýyn kezektesip ustap úlgergen. Olardyń qatarynda áıgili kınoaktrısa Qarlyǵash Muhametjanova, aqyn Bolatbek Orazbaev, bloger Aıtbek Aýlbaev, «Bazıs-A» korporasııasynyń tóraǵasy Pavel Belovıch, akter Asylhan Tólepov júrdi.
Qalalyq Ortalyq sýǵa júzý basseıni men Seıfýllın dańǵylyna deıin jeti núktede alaý ustaıtyndar sapynda ataqty sportshy Dáýlet Turlyhanov, «Qaırat» FK baqylaýshylar keńesiniń tóraǵasy Qaırat Boranbaev, Qazaq sport jáne týrızm akademııasynyń prezıdenti Qaırat Zákirııanov, tanymal jas shahmatshy Jansaıa Ábdimálik, estrada ánshisi Aıqyn Tólepbergen, Olımpıada oıyndarynyń kúmis júldegeri Islam Baıramýkov, akter, komedııalyq shoýmen Nurtas Adambaı jáne basqalarynyń esimderi ataldy.
Tańǵy saǵat 10.20-da alaý tutatqan estafetashylar kórsetilgen merzim boıynsha saǵat 14.00-de Gogol, Tólebı, Baıtursynuly, Sátbaev kóshelerin basyp ótip, Dostyq dańǵylymen tómen quldılap, Respýblıka saraıy aldyndaǵy Abaı eskertkishiniń túbine taban tiredi.
Sátbaev kóshesindegi 84-shi núktede Olımpıada chempıony Jaqsylyq Úshkempirovtiń qolynan estafeta alaýyn alǵan ataqty baıker Dmıtrıı Petrýhın alaýdy ál-Farabı atyndaǵy Ulttyq ýnıversıtettiń rektory Ǵalym Mutanovqa jetkizip berdi.
…Almatyda ótetin XXVIII Dúnıejúzilik Ýnıversıadaǵa qatysýshy 57 eldiń memlekettik týlaryn kótergen jastar qalyń toptyń arasynan júrip ótip, alaý tasymalaýshylarǵa jol ashty.
Toptyń aldyna túsip, bul júgirip kelgen Halyqaralyq stýdentter sporty federasııasynyń (FISU) prezıdenti Oleg Matysın edi.
Alaýdy qolyna alyp, tik kótere ustap dúıim jurt aldyna shyqqan búgingi Almatydaǵy ótip jatqan óte úlken sporttyq oıynnyń halyqaralyq jetekshisi bylaı dedi:
– Sizderge osy alańnan shynaıy sálem joldaımyn! Eń aldymen, Ýnıversıadanyń qazaq jerinde ótýine úlken eńbek sińirgen FISU komandasyna rızashylyǵymdy bildire otyryp, Qazaqstannyń Prezıdenti Nursultan Nazarbaevqa, qala ákimi Baýyrjan Baıbekke rahmet (qazaqsha – avt.) aıtqym keledi. ALǴA!..
…Estafeta alaýy arnaıy dúrildete soǵylǵan qol shapalaqtyń astynda arnaıy konteınerge salynyp, arnaıy jabdyqtalyp brondalǵan kólikpen keshkisin alaý jaǵylatyn «Almaty Arena» sport saraıyna jóneltildi.
Talǵat SÚIINBAI,
«Egemen Qazaqstan»
ALMATY