Jedel járdemge muqtajdyq kóbeıip tur

Bul aqparatty habar­la­ǵan oblystyq jedel me­dısınalyq jár­dem stansasynyń dırektory Serik Orynbasarov óńirde medı­sı­na­lyq járdem shaqyrtýlar 5,5%-ǵa ósip, olardyń sany 229 097 bol­ǵanyn aıtady.

Ádette, stansaǵa soǵylatyn qońyraýlar 4 sanatqa bólinedi. Esinen taný, júrek rıtminiń buzylýy, tynys alý qıyndaýy, qurysý, aýyr jaraqattar, qan ketý jáne t.b. jaǵdaılar shuǵyl kómekti talap etedi. Olarǵa «103» brıgadalary jedel attanyp, nor­­matıv boıynsha 10 mınýttan 30 mınýtqa deıin jetip, kómek kórsetedi.

Oral qalasynda jedel jár­dem qyzmetindegi árbir brıgada bir táýlik ishinde orta eseppen 16-17 shaqyrtý alyp, jolǵa shyǵady eken. Al aýyldyq jerde táýligine 8-9 shaqyrtý túsetin kórinedi.

– Bizge habarlasatyn naýqas­tardyń 26,3%-y – tynys alý organ­darynyń aqaýy bar naýqastar bolsa, qan aınalymy júıesi syr­qatyna shaldyqqandar bar­lyq shaqyrtýdyń 22,6%-yn quraıdy. Sondaı-aq nevrologııalyq aýrýlar – 10,4%, jaraqattar men jazataıym oqıǵalar – 7,4%, juq­pa­ly dertter – 5,7%, asqazan-ishek aýrýlary – 4,6%, hırýrgııa­lyq syrqattar – 3,6%, akýsher­lik-gınekologııalyq aýrýlar – 3,0%, zár shyǵarý joldarynyń ­aýrýy – 2,6% bolyp tur, – deıdi S.Orynbasarov.

О́ńirde jer-jerlerdegideı, qatty alań­datyp otyrǵan bir má­sele – jol-kólik oqıǵalarynyń ósýi. Polısııa departamentiniń má­li­metine qaraǵanda, 8 aı ishin­de 698 jol apaty tirkelgen. Osy­nyń saldarynan 64 adam qaza bolyp, 981 adam túrli dárejedegi jaraqat alǵan.

«Kóp jaǵdaıda kólik júrgi­zý­shileri tarapynan jol erejesi tár­tibi saqtala bermeıdi. Júr­gi­zýshiler arnaıy kólikke jol bermeıtin jaǵdaı jıilep ketti», deıdi jedel járdem stansasynyń basshysy.

Osyǵan oraı bıyl tamyz aıynda óńirlik densaýlyq saqtaý basqarmasy «Jedel járdemge jol ber» atty arnaıy aksııa ót­ki­zýge májbúr bolǵan. Aksııaǵa «103» brıgadasymen birge jol-patrýldik polısııasy, BAQ ókilderi qatysty. Reıd barysynda dybystyq jáne jaryq sıgnaldary qosylǵan jedel medısınalyq járdem kóligine jol bermeıtin kólik júrgizýshileri anyqtalyp, jazaǵa tartyldy.

Nesin jasyraıyq, sońǵy kezde medısına salasyna syn aıtýshylar da az emes. Sonyń biri – mamandardyń biliktiligi máselesi. Batys Qazaqstan oblysynda biraz jyldan beri medısına kadrlary jetispeıdi. Kadr tapshylyǵyn joıý úshin jergilikti bılik keshendi sharalardy qolǵa alǵan. Olar – dáriger mamandaryn daıarlaý úshin oblys ákiminiń granttaryn taǵaıyn­daý, medısına mamandaryna ar­nal­ǵan áleýmettik jeńildik­­ter. So­nymen birge óńirdegi bar medısına personalynyń bilik­ti­­li­gin arttyrý da únemi júrgizilip keledi.

Mysaly, jedel medısına­lyq kómek kórsetý sapasyn art­­ty­rý maqsatynda stansa qyz­metker­leri arasynda aýrýha­naǵa deıingi kezeńde (BLS, ACLS PALS, PHTLS) medısınalyq kó­mek kórsetýdiń halyqaralyq standarttary boıynsha 2 jyl saıyn oqý-tájirıbe jumysy uıymdastyrylyp turady. Sony­men qatar jedel járdem stansa­synda sımýlıasııalyq kabınet jumys isteıdi. Onda medısına qyzmetkerleri shuǵyl kómek kórsetý daǵdylaryn pysyqtaıdy. Kabınet eresekter men balalardy reanımasııalaýǵa, traheıa ıntýbasııasyna, konıkotomııaǵa, kók­­tamyr ishine jáne bulshyq et ishine engizýge arnalǵan mýlıajdarmen jabdyqtalǵan. Bıyl tamyz aıynda sımýlıasııalyq kabınet úshin naqty jaǵdaılarǵa barynsha jaqyn oqytýǵa, medı­sınalyq personal úshin sıtýa­sııa­lyq mindetterdi modeldeýge múmkindik beretin monıtory bar kópfýnksıonaldy tolyq ól­shemdi trenajer satyp alynǵan.

Aýyldyq jerlerdegi jedel járdem brıgadalarynyń kásibı daıarlyǵyn arttyrý maqsatynda 4 sımýlıasııalyq kabınet ashý josparlanyp otyr. Sondaı-aq bıyl ortalyq stansa bazasynda oqý-sımýlıasııalyq ortalyǵy da ashylmaq. Bul ortalyq jedel járdem qyzmetkerleriniń jattyǵý alańy bolmaq.

Batys Qazaqstan oblysy