Búginde Batys Qazaqtan oblysynda 97 343 egde jastaǵy adam bar eken. Onyń ishinde Ekinshi dúnıejúzilik soǵystyń 10 ardageri, EDS ardagerine teńestirilgen 706 adam, 213 soǵys jesiri, 2 234 tyl eńbekkeri ómir súrip jatyr.
«Qarttardyń memleket pen qoǵam aldyndaǵy eńbegin qurmetteý, olardyń ómir sapasyn arttyrý turǵysynda qamqorlyq kórsetý – memlekettiń bir mindeti. Sondyqtan oblysta aǵa býynnyń jaǵdaıyn jaqsartý jóninde 2025 jylǵa deıingi «Belsendi uzaq ómir súrý týraly» óńirlik is-sharalar jospary jasaqtaldy», deıdi Batys Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Dildásh Salaýatqyzy.
Jospar aıasynda Oral qalasynda, barlyq aýdanda qarttar kúnine arnalǵan qaıyrymdylyq aksııalaryn ótkizý, menshik nysanyna qaramastan, oblystyń kásiporyndaryn atalǵan sharaǵa qatysýǵa tartý, egde adamdarǵa materıaldyq kómek kórsetý, arnaýly áleýmettik qyzmet kórsetý ortalyqtarynda saltanatty is-sharalar ótkizý, kezdesýler uıymdastyrý, sondaı-aq basqa da qaıyrymdylyq sharalaryn ótkizý qarastyrylǵan. Sonyń ishinde 24 qyrkúıekten «Meıirbandyq kúnderi» oblystyq qaıyrymdylyq aılyǵy bastaldy.
Ardagerlerdi áleýmettik qorǵaý salasynda óńirde birqatar is-shara atqarylyp jatyr. Sonyń eń bastysy – ardagerlerge materıaldyq, áleýmettik qoldaý kórsetý. Máselen, 2024 jyly jergilikti bıýdjetten EDS-nyń 14 ardagerine – 1,5 mln teńge birjolǵy áleýmettik járdemaqy tólengen. Sondaı-aq Lenıngrad qorshaýynda bolǵan 1 adam, fashıstik lager tutqyny bolǵan 5 adam, keńes armııasynyń erikti jaldamaly quramynda bolǵan 1 adam – 120 myń teńgelik kómekke ıe bolǵan. Buǵan qosa 124 EDS jesiri – 30 myń teńgeden, 2 421 tyl ardageri – 50 myń teńgeden kómek alǵan.
Bıyl oblysta 380 zeınetker turǵyn úı kómegimen, az qamtylǵan zeınetkerler ataýly áleýmettik kómekpen qamtyldy. Sondaı-aq jeke ońaltý baǵdarlamasy arqyly múgedektigi bar zeınet jasyndaǵy 2 736 tulǵa ártúrli tehnıkalyq kómekshi quraldarmen, áleýmettik qyzmettermen qamtamasyz etildi. Onyń ishinde 86 adam protezdik-ortopedııalyq quralmen qamtylsa, 296 adam sanatorıı-kýrorttyq emdelýge jiberilgen. Múgedektigi bar adamdardy áleýmettik ońaltý baǵytynda 816 adam sýrdologııalyq, tıflotehnıkalyq quralǵa, 55 adam arbaǵa ıe bolǵan. Sonymen qatar júrip-turýy qıyn 281 adam jeke kómekshi qyzmetimen, 30 adam ymdaý tili mamanynyń qyzmetimen, 1 172 adam mindetti gıgıenalyq quraldarmen qamtamasyz etildi.
«Oblysta qazir 12 arnaýly áleýmettik qyzmet kórsetý ortalyǵy jumys istep tur. Sonyń ishinde qarttar men múgedektigi bar azamattarǵa arnalǵan 5 ortalyq bar. Búginge deıin barlyǵy 5 512 adam arnaýly áleýmettik qyzmetpen qamtyldy», deıdi Dildásh Salaýatqyzy.
Oblys aýmaǵynda belsendi uzaq ómir súrý, densaýlyq mádenıeti, qoǵammen baılanys baǵyttarynda jumys isteıtin eki ortalyq Bórli aýdany men Oral qalasynda ashylyp, belsendi jumys atqaryp tur.
Munda egde jastaǵy adamdardyń ómir súrý sapasyn jaqsartýǵa, ónimdi, belsendi uzaq ómir súrýdi yntalandyrýǵa, qarttardyń táýelsizdigin qamtamasyz etýge, qoǵam ómirine beıimdeýge jaǵdaı jasalǵan. Ortalyqta kásibı psıholog, dáriger, sporttyq jattyqtyrýshy, zańger, qazaq, aǵylshyn tili muǵalimderi, túrli úıirme mamandary kelýshilerge qyzmet kórsetedi. Qarttar aǵylshyn tilin oqyp úırenedi, kompıýterlik saýattylyq kýrsynan ótip, emdik dene shynyqtyrýmen aınalysady. Nátıjesinde, qarttardyń qoǵamdyq belsendiligi artyp, psıhologııalyq-emosıonaldyq jaǵdaıy túzeledi. Jyl basynan beri qos ortalyqta 1 347 turaqty kelýshi tirkelgen.
Buǵan qosa, Oral qalasynda «Mádenı-aǵartý birlestigine» qarasty «Araı», «Atameken», «Aqberen», «Bolashaq», «Balaýsa», «Báıterek», «Juldyz», «О́rken» komıýnıtı ortalyqtary qarııalarmen de qoıan-qoltyq jumys isteıdi. Máselen, «Araı» komıýnıtı ortalyǵynda smartfon saýattylyǵy úıirmesine 10 qarııa qatysady. Bul úıirme egde jastaǵy adamdarǵa smartfon baǵdarlamalaryn úıretýge arnalǵan. Al «Atameken» komıýnıtı ortalyǵynda «Atameken» ájeler vokaldyq toby qurylǵan. Oǵan 12 áje qatysady. «Báıterek» komıýnıtı ortalyǵy balalar men jasóspirimderdiń bos ýaqytyn tıimdi ótkizýmen qatar, zeınetkerler men ardagerlerge de túrli baǵyttaǵy is-shara ótkizip turady. Ortalyqta 12 adamdyq «Jaıyq tolqyndary» vokaldyq toby bar. Al «Salamatty ómir salty» úıirmesi quramynda 65-75 jas aralyǵyndaǵy 35 zeınetkerdiń basyn qosqan. «Aqberen» komıýnıtı ortalyǵynda 10 adamnan quralǵan «Aqnıet» ájeler ansambli jumys istep tur.
Bulardan bólek, «Ardager» klýbynda halyqtyq «Aǵalar áýeni», «Arý analar», «Áje sálemi» vokaldyq toptarymen qatar «Naryn sazy», «Asyl ájeler» vokaldyq toptary túrli is-sharada sahnaǵa jıi shyǵady. Bul toptarda 65 adam bar. Salamatty ómir saltyn nasıhattap júrgen «Shahmat» klýbyna kún saıyn 30-35 adam kelip, bos ýaqytyn mándi ótkizedi.
Memlekettiń órkenıetti beınesi qarııalarǵa degen qurmetinen de kórinip turady. Qarııasyn rıza qylǵan qoǵamnyń bolashaǵy da zor.
Batys Qazaqstan oblysy