Fýtzaldan О́zbekstanda ótip jatqan álem chempıonatynyń jartylaı fınalyna joldama alǵan komandalar tolyqtaı anyqtaldy. О́kinishke qaraı, olardyń qatarynda el quramasy joq. Osyǵan deıin óreli oıyn órnegi, keremet taktıkalyq daıarlyǵy jáne tehnıkalyq arsenalymen kózge túsken Rıkardo Kakanyń shákirtteri shırek fınaldyq saıysta Argentınadan oısyraı utyldy.
Ońtústik Amerıkanyń oǵlandary 2016 jyly Kolýmbııada álem chempıony atandy. Sheshýshi tusta olar Reseıden 5:4 esebimen basym tústi. 2021 jyly Lıtvada uıymdastyrylǵan álem chempıonatynda kúmis medal ıelendi. Fınalda 1:2 esebimen Portýgalııaǵa ese jiberdi. Amerıka kýboginde 13 ret (3 altyn, 7 kúmis, 3 qola) jeńis tuǵyryna kóterildi.
Argentınalyqtarmen Qazaqstan quramasy úsh ret kezdesti. 2016 jyly Kolýmbııadaǵy dúnıejúzilik dodanyń toptyq týrnırinde báseke taǵdyryn Alamıro Vaporakı soqqan jalǵyz gol sheshti – 1:0. Kelesi jyly Bangkoktaǵy «Korol kýbogi» jolyndaǵy jarysta jolymyz qaıta qıysty. Bul joly teń tarastyq – 0:0. Bıyl 8 qyrkúıekte Almatydaǵy Balýan Sholaq atyndaǵy sport saraıynda joldastyq kezdesý ótkizdik. Bul match 3:2 esebimen jerlesterimizdiń paıdasyna sheshildi.
Tashkentte ótken básekeni tamashalaý úshin «Hýmo Arenaǵa» 12 000 kórermen jınaldy. Bul keshen dál osynsha adamdy ǵana syıdyra alady. Iаǵnı barlyq bılet satylyp ketken. Buǵan deıingi osy jarystaǵy birde-bir match dál osynsha jankúıerdi jınamaǵan edi. Solardyń barlyǵy Qazaqstan quramasyna qoldaý kórsetti dep aıtsaq, esh qatelespeımiz. Tek bir-eki jerde ǵana Argentınanyń týy jylt etkeni bolmasa, sol keshte «Hýmo Arenada» qazaqtyń kók baıraǵy kózdiń jaýyn aldy.
Kezdesýdiń alǵashqy mınýttarynda Rıkardo Kaka alańǵa Igıta, Aqjol Dáribaı, Leo, Dáýren Tursaǵulov jáne Dýglasty shyǵardy. Argentınada da bes serkesine senim artty. Birinshi kezeń alma-kezek shabýylmen ótkenimen, esep ashylmady. Úzilisten keıin bári 180 paıyzǵa ózgerdi. Ekinshi taım bastalǵanyna 1 mınýt 59 sekýnd ótkende Matıas Roza esep ashty – 1:0. Arada bes mınýt ótkennen keıin Shyńǵys Esenamanov dopty artqa bermekshi bolyp ony Igıtadan asyryp jiberdi de, óz qaqpamyzdyń baǵanasyna tıgizdi. Sol kezde alǵyrlyq tanytqan Anhel Klaýdıno ekinshi goldy soqty – 2:0. Kóp uzamaı Arnold Knaýp dopty qolmen toqtatyp, tóreshi penaltı belgiledi. Qolaıly núkteden Kevın Arrıeta múlt ketken joq – 3:0. Sodan keıin-aq Qazaqstan fýtzalshylarynyń oıynynan bereke ketti. Olar Igıtany almastyryp, alańǵa taǵy bir oıynshy shyǵaryp álek boldy. 32 mınýtta Sebastıan Korso dopty bos qaqpaǵa baǵyttady – 4:0. Áıteýir retin taýyp, Dáýren Tursaǵulov bir goldy óz enshisine jazdy – 4:1. Biraq onymen argentınalyqtar toqtap qalǵan joq. 34-mınýtta Lýkas Bolo-Alemanı mergendik tanytty – 5:1. 36 mınýtta erejeni óreskel buzǵany úshin Tursaǵulov alańnan qýylyp, penaltıdi Kevın Arrıeta sátti oryndady – 6:1. Sóıtip, Qazaqstan quramasynyń álem chempıonatyndaǵy joryǵy aıaqtaldy.
Jartylaı fınalda Argentına Fransııamen kúsh synasady. Shırek fınalda fransýzdar Paragvaıdy (2:1) utty. Sondaı-aq ekinshi jartylaı fınalda Brazılııa men Ýkraına komandalary oınaıdy. Bul básekeler 2, 3 qazanda ótedi. Brazılııalyqtar Marokkodan (3:1) basym tússe, ýkraınalyqtar Venesýelanyń (9:4) tas-talqanyn shyǵardy.