Búgin, halyqaralyq qarttar kúnine oraı, Elordadaǵy «О́ndiris» turǵyn alabynda turatyn zeınetkerler úshin, №7 balalar sport kompleksinde «Qarttarym – asyl qazynam» atty merekelik is-shara ótti, dep jazady Egemen.kz.
Is-sharany ótkizýdegi maqsat: qart kisilerge qurmet kórsetý, ata-babadan kele jatqan saltymyzdy jańǵyrtý. Zeınetkerlerdiń ómirlik tájirıbeleri men aqyl-keńesterin tyńdap, tálim-taǵylym alý. Jas jetkinshekterdi úlkendi qurmetteýge, salt-dástúrimizden nár alýǵa, ınabattylyqqa, meıirimdilikke tárbıeleý.
«Belsendi uzaq ómir súrý» ortalyǵynyń ónerpazdary jáne osyndaǵy mektep oqýshylary konserttik baǵdarlamasymen qarttarǵa merekelik kóńil-kúı syılady. Merekelik sharany barlyǵy 60 zeınetker tamashalady. Sonymen qosa, qarttarǵa úıirmelerdiń qyzmeti tanystyryldy.
«Belsendi uzaq ómir súrý» ortalyǵynda 5 úıirme bar. Atap aıtqanda, ıoga, ońaltý gımnastıkasy, ústel tennısi, vokal, qolóner. Trenajerlik zalda ornalasqan úıirmelerge qarttar tegin qatysady. Aldaǵy ýaqytta zeınetkerler úshin horeografııa, dombyra, gıtara úıirmelerin ashý josparda bar», deıdi úıirme jetekshisi Aqsholpan Moldasheva.