Qytaıdyń Harbın qalasynda Azııa olımpııalyq keńesi ókilderiniń qatysýymen 2025 jyly alaýy tutanatyn qysqy Azııa oıyndaryna daıyndyq barysy jaıynda semınar ótti. Bul is-sharaǵa elimizdiń Sport departamentiniń dırektory Bektur Qııatbaı, Halyqaralyq qatynastar departamentiniń bas menedjeri Aızat Qarashashev qatysty. Semınardan bólek UOK qyzmetkerleri jeke kezdesý ótkizip, onda uıymdastyrýǵa qatysty merzim, logıstıka, turatyn jerlerdiń jaǵdaıy, júk tasymaldaý, sporttyq jabdyqtardy rásimdeý, taǵy basqa máseleleri talqylandy.
Almaty oblysy aýmaǵynda stend atýdan ótken Azııa kýbogi jolyndaǵy jarysta el quramasy 14 júldege qol jetkizdi. Onyń altaýy – altyn. Jekelegen saıystarda Ásem Orynbaı, Edýard Eshenko, Nıkıta Moıseevke teń keler eshkim tabylmady. Sondaı-aq komandalyq básekede elimizdiń erler (Davıd Pochıvalov, Edýard Eshenko, Ilıa Penkov) men áıelder (Ásem Orynbaı, Zoıa Kravchenko, Ádel Sadaqbaeva) quramasy da top jardy.
Taıpeıde sadaq atýdan jasóspirimderdiń Azııa birinshiliginde jerlesterimiz qos qola medalǵa ıe boldy. Aralas juptar arasynda Andreı Tıýtıýn men Olga Nejıvyh, komandalyq jarysta Olga Nejıvyh, Anastasııa Ershova, Kámıla Ǵazızova úshinshi oryndy enshiledi.
Elimizdiń jas tennısshisi Beıbit Juqaev Shanhaıdaǵy ATP 1000 serııasyndaǵy týrnırdiń negizgi bóliginde kúsh synasý quqyǵyna ıe boldy. Irikteý saıysynyń fınalynda ol ulybrıtanııalyq Bıllı Harrısti 7:5, 2:6, 6:4 esebimen qapy qaldyrdy. Alǵashqy aınalymda qandasymyz Roman Safıýllınge qarsy oınaıdy. Beıbitten bólek, atalǵan dodada qos Aleksandr – Býblık pen Shevchenko da óner kórsetedi.
Bul kúnderi fýtboldan elimizdiń jasóspirimder quramasy (U-15) Mınskide jalaýy jelbiregen «ÝEFA Damý týrnırinde» baq synap jatyr. Tusaýkeser kezdesýinde Reseıden 0:7 esebimen oısyraı utylǵan otandastarymyz kelesi matchta Belarýske ese jiberdi – 2:3. 4 qazanda bizdiń komanda Ázerbaıjanmen sheberlik baıqasady.
15 jeltoqsanda Máskeýde aralas jekpe-jekten ACA 182 týrnıriniń shymyldyǵy túriledi. Basty básekelerdiń birinde elimizdiń faıteri Artem «Spartak» Reznıkov (24-7, 18 KO) reseılik Iýsýp «Borz» (19-3, 13 KO) Raısovpen kúsh synasady. Qos sportshy osydan tórt jyl buryn dál osy promoýshenniń týrnırinde aıqasty. Ol kezde jerlesimiz tóreshilerdiń sheshimimen jeńiske jetti.
Halyqaralyq bıatlonshylar odaǵy (IBU) 2028, 2029 jyldardaǵy álem chempıonattaryn qabyldaıtyn qalalardy anyqtady. Bul básekeler Aýstrııanyń Hohfılseni men Norvegııanyń Oslosynda ótedi. Al 2025, 2027 jyldardaǵy doda Shveısarııanyń Lenserhaıdesi men Estonııanyń Otepııasynda uıymdastyrylady.
Álemdegi eń qundy fýtbolshylar kóshin Erlıng Holand bastap tur. Germanııanyń «Transfermarkt» portalynyń málimdeýinshe, Norvegııa ulttyq quramasy men Anglııanyń «Manchester Sıtı» klýby shabýylshysynyń qazirgi kezdegi transferlik baǵasy – 200 mıllıon eýro. Odan keıingi oryndarda bul kúnderi Madrıdtiń «Realynyń» namysyn qorǵap júrgen brazılııalyq Vınısıýs Jýnıor, anglııalyq Djýd Bellıngem, fransııalyq Kılıan Mbappe tur. Olardyń quny – 180 mıllıon eýro.