«Samuryq-Qazyna» bıznes ókilderin seriktestikke shaqyrady

«Samuryq-Qazyna» AQ men «Qazaqstan halqyna» QQ birlese uıymdastyrǵan alqaly jıyn maqsaty – memleket pen bıznes jáne úkimettik emes uıymdar arasynda ulttyq qaıyrymdylyq úlgisin órkendetý, tájirıbe men aqparat almasý. Bul rette paneldik sessııanyń biri áleýmettik jobalardy júzege asyrýdaǵy korporatıvtik seriktestik keleshegine arnaldy.

Máselen, qordyń biryńǵaı qaıyrym­dy­lyq operatory «Samruk Kazyna Trust» KQ elimizde jumys isteıtin sheteldik alpaýyt kompanııamen yntymaqtastyǵy aıasynda 180 erekshe jan AI-maman, No Code ázirleýshi, UI/UX + Web-sheber syndy úsh baǵyt boıynsha oqyp jatyr. Joba barysynda kásibı, áleýmettik daǵdylardy damytý arqyly múgedektigi bar adamdardy jumysqa ornalastyrýǵa járdemdesý maqsat etilgen.

Úkimettik emes uıymdarmen tyǵyz baılanys ornatqan qaıyrymdylyq operatorynyń qyzmeti ashyq ári qoljetimdi, senimdi bolýyna kúsh salynyp keledi.

«Korporatıvtik áleýmettik jaýapker­shilik qor jumysynyń mańyzdy bóligi bolyp sanalady. Biz korporatıvtik qaıyrym­dy­lyqqa kásibı basqarýdy qajet etetin jeke baǵyt retinde qaraımyz. Sondyqtan, ózderińiz biletindeı, «Samruk Kazyna Trust» qory quryldy. 2024 jyly qaıyrymdylyq jáne áleýmettik jobalarǵa 35,6 mlrd teńge baǵyttaldy. Nátıjesinde, jarty mıllıonnan astam adam kómek alsa, olardyń 30 myńy – bala», dep atap ótti «Samuryq-Qazyna» AQ Basqarma tóraǵasy Nurlan Jaqypov.

«Samuryq-Qazyna» ulttyq ál-aýqat qory 81 mıllıard dollardan astam aktıv­ter­di basqarady, álemdegi TOP 30 egemen qordyń qataryna kiredi. Qor tobyndaǵy kompanııalar ekonomıkanyń san salasynda usynylǵan. Qordyń basty maqsaty – qara­maǵyndaǵy aktıvterdiń qunyn arttyrý. Tutastaı alǵanda, qor óz qyzmetinde Úkimetke 2,9 trıllıon teńgege jýyq dıvıdend pen basqa da tólemderdi tólep, qaıyrymdylyq maqsattarǵa qarjy bólip, respýblıkalyq bıýdjetti qoldaýǵa, áleýmettik ınfraqurylymdy damytýǵa eleýli úles qosyp otyr.

«Samruk-Kazyna Trust» qorynyń qaıyrymdylyq qyzmetine senim joǵary

Bıyl kóktemde oryn alǵan tasqyn saldarymen kúreske «Samuryq-Qazyna» qorynyń enshiles kásiporyndarynyń sheteldik seriktesteri biryńǵaı qaıyrymdylyq operatory «Samruk-Kazyna Trust» qoryna 2 mlrd teńgeden astam qarajat aýdardy.

«Bul – qor qyzmetiniń ashyqtyǵy men bıznes tarapynan joǵary senim belgisi. Senimdi seriktestik pen ıgi isterge atsalysýǵa berilgen múmkindik úshin alǵysymdy bildiremin», dedi qaıyrymdylyqqa qarajat aýdarǵan «Azııa gaz qubyry» JShS bas dırektorynyń bıznesti qoldaý jónindegi orynbasary Lı Sıanszıýı. Kásiporyn bıyl maýsym aıynda qor arqyly sý tas­qynymen kúreske 1 mlrd teńge bóldi. Sony­men birge qordyń qaıyrymdylyq operatoryna qarajat jibergen ORANO kor­porasııasynyń enshiles kásiporny «KATKO» BK» JShS bas dırektory Paskal Bastıen de aldaǵy ýaqyttaǵy seriktestikke atsalysýǵa múddeli ekenderin jetkizdi.

Jınalǵan qarajatqa tasqynnan zardap shekken Atyraý jáne Batys Qazaq­stan ob­lystarynda zamanaýı deneshy­nyqtyrý-saýyqtyrý keshenderi salynady. Bul keshender buqaralyq sport qoljetimdiligin qamta­masyz etip qana qoımaı, áleýmettik ınfra­qu­rylymdy qalpyna keltirýge yqpal etetin qoǵamdyq ómir ortalyǵyna aınalady.

«Qazaqstan halqyna» qoǵamdyq qoryna jyl saıyn qordyń taza tabysynyń keminde 7%-y aýdarylyp otyr. 2023 jyldyń qory­tyn­­dysynda bul soma 67 mlrd teńgeni qura­dy.

Qordyń áleýmettik saıasatynyń basty maqsaty – ınklıýzııa, ıaǵnı teń qoǵamdy damytý, medısına men bilim, aýyldyq jerlerdi damytý syndy baǵyttardyń basyn qosatyn keshendi kózqarasty ustaný. Osy oraıda múgedektigi bar adamdar men halyqtyń áleýmettik osal toptaryn qoldaýdaǵy ilkimdi qadamdardyń keıbirine toqtalsaq, sońǵy úsh jylda 42 ońaltý ortalyǵy iske qosylyp, jyl saıyn 20 myńnan astam balaǵa kómek beriledi. Tıisti ortalyqtardy ári qaraı da qoldanysqa berý óńirlerdegi ońaltý qyzmetin odan ári qoljetimdi ete túspek.

Erekshe balalardy ońaltý men bilim alýyna jaǵdaı jasaýdan bólek, olardy beıimdelgen sport túrlerine baýlý máselesi qolǵa alynǵan. Qazirgi tańda 23 qala men eldi mekende túrli sport túrleri boıynsha 1 100 erekshe balaǵa arnalǵan 89 seksııa tegin jumys istep tur. Qatysýshylardyń bir­qatary respýblıkalyq qana emes, halyq­­aralyq saıystardyń júldegeri atandy.

Jyl saıyn qor qoldaýymen «Salamatty Qazaqstan» poıyzy aıasynda shalǵaı­­­da­ǵy aýyl­­­darda 100 myń adamǵa tegin medı­sı­nalyq-quqyqtyq kómek kórsetiledi. Budan bólek, Almatydaǵy Ulttyq pedıat­rııa ortalyǵy qan tazalaıtyn zamanaýı medı­sınalyq quralmen jabdyqtalǵan. Aýyldyq aýrýha­na­larǵa 23 jedel járdem kóligi tabystalǵan. Taıaýda Ulttyq travmatologııa jáne ortopedııa ǵylymı ortalyǵyna zamanaýı ınno­vasııalyq jabdyqtar berildi. Aýyr syrqat­qa shaldyqqan 1 319 balany shetelde emdetýge múm­kindik jasaldy.

Buqaralyq sport ınfraqurylymyn damytý maqsatynda qor demeýshiligimen, Qyzylorda oblysynda Syrdarııanyń sol jaǵalaýynda ústel tennısi ortalyǵy salyndy. Shyǵys Qazaqstan oblysyndaǵy Qatonqaraǵaı, Zaısan aýdandarynda tusaýy kesilgen sport alańdary «Samuryq-Qazyna» qorynyń qoldaýymen sońǵy úsh jylda elimiz boıynsha boı kótergen tıisti nysandardyń sany 30-ǵa jýyqtady. Qor buqaralyq sportty damytý, balalarǵa sport ınfraqurylymyn qoljetimdi etý baǵytynda sport alańdarynan bólek, el kóleminde 10 deneshynyqtyrý-saýyqtyrý kesheni men kópfýnksıonaldy sport keshenin iske qosty.

Qor qoldaýymen bıyl altynshy márte jolǵa shyqqan «Týǵan elge saıahat» jazǵy balalar poıyzynda sý tasqynynan zardap shekken óńirlerden qatysqan 200 balany qosqanda, barlyǵy 400 jetkinshek 2 kezeńde el aımaqtaryndaǵy tanymal mádenı-tarıhı oryndaryn aralady. Sony­men birge saıahatqa qatysýshylar «Taza Qazaq­stan» jalpyulttyq aksııasyna ún qosyp, sapar boıy ekologııalyq ómir saltyn qalyp­tas­tyrdy.

О́ńirlerdegi jastar ómirine tyń serpin, jańasha lep berý maqsatynda Qor ótken jyly Aqtóbedegi kitaphanany adam tanymastaı etip ózgertken bolsa, búginde elimizdiń batysy men teriskeıinde eki birdeı shyǵarmashylyq keńistikti qoldaýdy jón dep tapty. Sonymen qatar Qor muny­men shektelmeı, Semeıde tuńǵysh ret kózi nashar kóretin jáne zaǵıp azamattarǵa arnap kitaphana qurylysyna kómek jasap jatyr. Eki qabatty, 805 sharshy metrden turatyn qazirgi zamanǵy eńseli ǵımaratta arnaıy baǵdarlamalar ornatylyp, erekshe jandar Braıl qarpinde jazý men oqýdy meńgermek.

Taǵy bir tásil – kraýdfandıng

Iri kompanııalar qoǵamdaǵy kraýdfandıng bastamalaryna qosylyp, jarna jasaý arqyly qoǵam men bıznes úndestigine qadam jasaı alady. Tabysty yntymaqtastyqtyń jarqyn mysaldarynyń biri – 1 maýsymda Qordyń uıymdastyrýmen ótken «Samruk Charity Marathon» qaıyrymdylyq marafony.

Marafon barysynda Qordyń biryńǵaı qaıyrymdylyq operatory «Samruk-Kazyna Trust» qoryna 1 000-ǵa tarta azamat pen 30-dan astam kompanııadan 126,7 mln teńge tústi. Bul qarajatqa Astananyń 5 mektebinde ınklıý­zııany qoldaý kabınetteri ashyldy. Nátıjesinde, 150-den astam erekshe balanyń qatarlastarymen birge mektepte bilim alýy­na múmkindik qamtamasyz etildi.

Osylaısha, bıznes ókilderi shaǵyn qara­jatpen-aq qaıyrymdylyq bastamalardy qoldaı alady. Kásipkerler qoǵammen baı­la­nysyn jaqsartyp, áleýmettik jaýap­ker­shiligin nyǵaıta túsedi. Ári bul qadam qoǵam­da qaıy­rymdylyq mádenıetin damytý­ǵa yq­pal etedi.

Jaqsylyqqa jany qushtar bala marapattaldy

Ulttyq qaıyrymdylyq konferensııasynda Qor Álnazar Ádisbek esimdi balany marapattady. Ol qaıyrymdylyq marafonyna belsene qatysyp, áleýmettik jobalardy iske asyrýǵa óz úlesin qosqan búginginiń batyry.

«Samruk Charity Marathon» sharasynda aıryqsha qaısarlyqpen júgirip ótken Álnazar búginde elordadaǵy №97 mekteptegi ınklıýzııany qoldaý kabınetinde bilim alyp jatyr.

Sonymen qatar sý tasqyny saldary­men kúreske atsalysyp, Qor arqyly qarjy bólgen «Azııa gaz qubyry» JShS, ORANO («KATKO» BK), CGN kompanııalary mara­­pat­qa ıe boldy.

Aldabergen KEMPIRBAI