Astanada «Juldyzaı-2024» atty ulttyq ınklıýzıvti oıyndar ótti, dep habarlaıdy Egemen.kz. Bul týraly Astana qalasynyń Dene shynyqtyrý jáne sport basqarmasy málimdedi.
Básekege 10-16 jastaǵy múmkindigi shekteýli balalar men jasóspirimder qatysyp, jeńil atletıka, golbol, mını-fýtbol, ústel tennısi, ulttyq oıyn túrleri: bes tas, asyq atý jáne toǵyzqumalaq sııaqty sporttyń jeti túrinen synǵa tústi. Jarysqa elimizdiń ár óńirinen 600-ge jýyq sportshy qatysty.
Uıymdastyrýshylardyń aıtýynsha, is-sharanyń negizgi mindeti – balalardyń sportqa degen qyzyǵýshylyǵyn oıatý, salaýatty ómir saltyn ustanýǵa, olardyń sporttyq áleýetin damytýǵa jáne fızıkalyq, ıntellektýaldyq shekteýlerge qaramastan joǵary nátıjelerge qol jetkizýge yqpal etý. Sonymen qatar oıyndar múmkindigi shekteýli balalardyń aldynda turǵan máselelerge qoǵamnyń nazaryn aýdarady.
Saltanatty is-sharanyń ashylý rásimine paradzıýdodan Parıj Paralımpıadasynyń kúmis júldegeri Erǵalı Shámeı arnaıy qatysty.
«Sońymnan erip kele jatqan ini-qaryndastaryma sáttilik tileımin! О́zim paradzıýdo sportynan úlken jetistikterge jettim. Áli de toqtap qalmaımyn. Sizder de biz sekildi qazaqtyń kók týyn abyroımen asqaqtatyn bolasyzdar. Bizden de asyp túsýge tilektespin. Sol úshin tynymsyz eńbek etip, úmitterińizdi eshqashan úzbeńizder. Osynda kelip otyrǵan qadamdaryńyzdyń ózi – úlken jeńis. Barlyǵyńyzǵa sáttilik tileımin!», dedi ol.
Aıta keteıik, aýqymdy is-shara 2016 jyldan beri turaqty túrde uıymdastyrylyp keledi.