Taldyqorǵandyq kásipker Nurdáýlet Aqkóz aıyna 140 tonna qubyr shyǵaratyn «Polımmer Pire» kásipornyn iske qosqan. Sý, gaz, káriz, ylǵaldy jerdi qurǵatý júıelerinde, telekommýnıkasııada qoldanylatyn otandyq ónimge suranys óte joǵary. Oǵan jalpy kólemi 106 mln teńge ınvestısııa tartylypty.
Jańa otandyq ónimniń sapasy halyqaralyq standarttarǵa tolyqtaı saı. Polıetılen qubyrlary tabıǵattyń kez kelgen qytymyr jaǵdaıyna tótep bere alady. Ári joǵary-tómendi temperatýradaǵy ystyq pen sýyqqa birdeı tózimdi. Búginde polıetılen qubyrlaryn paıdalanbaıtyn sala kemde-kem. Joǵaryda aıtqan sý, gaz, káriz jelileri men telekommýnıkasııa salasynan bólek, onyń qurylys, munaı-gaz óndirisine de tıgizetin paıdasy kól-kósir.
«Sý, gaz jelilerine qajetti dıametri 15 mm-den 160 mm-ge deıingi, uzyndyǵy tapsyrys berýshiniń ólshemi negizinde daıyndalatyn qubyrlar shyǵaramyz. Taýarlarymyzdyń sapasy halyqaralyq talapqa saı», deıdi «Polımmer Pire» JShS quryltaıshysy Nurdáýlet Aqkóz.
«Qazir qubyr óndiretin shıkizattardy Iran, Qytaı, Reseı elderinen ákelip otyrmyz. Aldaǵy ýaqytta qajetti shıkizat shyǵaratyn zaýytty ózimiz ashsaq degen de oı bar. Maqsatymyz oryndalsa, ónim baǵasy arzandap, suranys artady», dedi ol.
О́nim ekologııalyq turǵydan taza. Qoldanylý merzimi 50 jyldan asyp túsedi. Eldi mekenderdi sapaly sýmen qamtyp, tolyq gazǵa kóshirý isinde polıetılen qubyrlar suranys pen qajettilikti óteı alady.
«Qubyr óndirýge joǵary, orta, tómen qysymdy polıetılen qoldanylady. Kóbinde sý men gaz jelisin tartýǵa qoldanylatyn tómen qysymdy polıetılen shıkizatyn paıdalanamyz. Jumys barysy birneshe bólikke bólinedi. Ár qurylǵynyń óz qyzmeti bar. Biri shıkizatty sorǵysh arqyly stanokqa jetkizse, ekinshisi balqytady, sýytady, úshinshisi qubyr shetine túrli tústi syzyqtardy órnekteıdi, ári qaraı zaýyt ataýyn, óndirilgen ýaqytyn, basqa da qosymsha aqparattardy lazer arqyly qubyr betine tańbalaıdy», deıdi zaýyt jumysshysy Vıacheslav Kozyrev.
Joba ıeleri aldaǵy ýaqytta óndiris qýatyn ulǵaıtýdy kózdep otyr. Mundaı jaǵdaıda olar dıametri 160 mıllımetrlik polıetılen qubyr shyǵarýmen shektelip qalmaıdy. О́ndiriske tyń, jańasha kózqaras qajet. Osy rette kásiporynda óndiris qýatyn joǵaryda aıtylǵan kólemde kóterý baǵytynda naqty is-sharalar belgilengen. Sonyń biri – dıametri aldyńǵy ónimnen eki ese úlken polıetılen qubyrlar shyǵarý. Munyń syrtynda áınek pen talshyqtyń qospasynan jasalǵan qubyr jobasyn da oılastyryp otyr.
Jetisýda shaǵyn jáne orta bızneste ónim men qyzmet kórsetý kólemi ótken jyldyń sáıkes merzimimen salystyrǵanda edáýir ósken. Salany qarjylyq qoldaý sheńberinde 7,4 mlrd teńge bólingen. Bul sektorda 60 myń sýbekti bar, onda 108 myńnan asa adam jumys isteıdi. Búginde 12,2 mlrd teńgege 201 joba maquldanǵan.
Jetisý oblysy