Búgin Qazaqstan Respýblıkasynyń Prezıdenti Is basqarmasyna qarasty Prezıdenttik ortalyqta qazaqtyń uly aqyny Abaı Qunanbaıulynyń shyǵarmashylyǵyna arnalǵan «VIII Abaı oqýlary» jyl saıynǵy ádebı baıqaýynyń jeńimpazdaryn marapattaý rásimi ótti, dep habarlaıdy Egemen.kz.
Is-sharaǵa L.N. Gýmılev atyndaǵy Eýrazııa ulttyq ýnıversıteti «Abaı akademııasy» ǴZI gýmanıtarlyq ǵylymdardy zertteý bóliminiń basshysy Altynaı Asqarova, «Qara shańyraq» respýblıkalyq qoǵamdyq birlestiginiń dırektory Turar Shaken, QR Prezıdenttik ortalyqtyń qyzmetkerleri, baıqaýda baq synaǵan qatysýshylar, mektep muǵalimderi men oqýshylary jáne BAQ ókilderi qatysty.
Qazaqstan Respýblıkasy Prezıdenttik ortalyǵy dırektorynyń orynbasary Serik Sydyqov qazaq klassıkalyq jazba ádebıetiniń negizin qalaýshy Abaı Qunanbaıulynyń asyl murasyna toqtalyp, baıqaýǵa qatysýshylarǵa sáttilik tiledi.
«Abaıdyń shyǵarmalarynda Adam, Bolmys jáne Ǵalam taqyryby, sondaı-aq, absolıýttik aqıqat syry turaqty oryn alady. Jalpy adamzat balasyna ortaq asyl sózge aınalǵan Abaıdyń qara sózderindegi gýmanıstik, aǵartýshylyq, áleýmettik oılary tutas bir qazaq halqynyń fılosofııalyq konsepsııasyn quraıdy. Mine sondyqtan da Memleket basshysy Qasym-Jomart Toqaev: «Abaıdy taný – adamnyń ózin-ózi tanýy. Adamnyń ózin-ózi tanýy jáne únemi damyp otyrýy, ǵylymǵa, bilimge basymdyq berýi – kemeldiktiń kórinisi. Intellektýaldy ult degenimiz de – osy. Osyǵan oraı, Abaı sózi urpaqtyń baǵyt alatyn temirqazyǵyna aınalýy qajet», – dep ulylardyń artynda qaldyrǵan murasyn qadirlep, qasterleýge shaqyryp otyr», dedi S.Sydyqov.
Abaıdyń ádebı murasyn nasıhattaý, Qazaqstan jastarynyń oqý mádenıetin, ádebı talǵamyn qalyptastyrýdy kózdeıtin baıqaýǵa bıyl elimizdiń túkpir-túkpirinen 300-ge jýyq qatysýshy óz jumysyn joldaǵan. Solardyń ishinen júzden júırik, myńnan tulpar shyqqan úzdikter irikteldi.
Baıqaý qorytyndysy boıynsha tómendegideı nomınasııa ıegerleri anyqtaldy: «Eń kishkentaı qatysýshy» – Jánibek Toqaev, «Kórermen kózaıymy» – Abdýrahman Imanǵalı, «Úzdik arnaý» – Nurdos Igambaev, «Qara sózdi qadirlegen» – Toǵjan Qýanysh, «Abaı áni álemde» – Saǵynysh Nazar, «Ustaz ónegesi» – Qanat Sadýaqasova.
Dástúrli saıysta aınalasynan at ozdyrǵan jeńimpazdar:
III oryn – Dıana Bıjanova
III oryn – Alına Abzalova
II oryn – Alfınýr Ermýratova
II oryn – Symbat Satybaldy
I oryn – Aıǵanym О́mirjan
Júldegerlerge arnaıy dıplomdar men estelik syılyqtar tabystaldy.