Halyq murasy qat-qabat qazynaǵa toly. О́ner dese ishken asyn jerge qoıǵan qazaq jurty, qaıbir óner túrinen de talantty, dara. Dý-dýmanda arqalanǵan abzal halyqtyń bitim-bolmysyn «Bizdiń jármeńkeden» taǵy bir tamashalaǵandaı boldyq.
Roza Baǵlanova atyndaǵy «Qazaqkonsert» memlekettik akademııalyq konserttik uıymynyń «Halyq qazynasy» ulttyq óner ortalyǵy kórermenge Qoıandy, Kókjar, Qaraótkel syndy taǵylymy mol tarıhı jármeńkelerdi jańǵyrtqan jańa formattaǵy «Bizdiń jármeńke» dýmandy keshin ótkizdi. Álqıssasy belgili kúıshi Janǵalı Júzbaıdyń batasymen bastalǵan sarabdal jıyn sahna sańlaqtarynyń mazmundy ónerimen jalǵasty. Dástúrli ónerdiń barlyq túrin qamtyǵan shoý-konsertte delebesi qozbaǵan kórermen sırek.
Keshte Qazaqstannyń eńbek sińirgen qaıratkerleri Qumarbek Qalqataı, Ardaq Balajanova, Elmura Jańabergen, Aıgúl Elshibaeva, Raýshan Orazbaeva, Aızat Qarabekova, Nurbolat Arzamasuly, Mádenıet qaıratkerleri Tolǵanbaı Sembaev, Erbolat Shaldybekov, Mádenıet salasynyń úzdigi Perızat Turarova, «Daryn» jastar syılyǵynyń laýreattary Asqar Muqııat, Kúnsulý Túrikpen, Ardaq Eleýsiz, halyqaralyq baıqaýlardyń laýreattary Aqerke Tájibaeva, Dinıslambek Jaılaýbaı, Birjan Aıtahmetov, Álıhan Dúısenbaı, Venera Tabys, Darııa Bekpenbetova, Aıaýlym Qamajan óner kórsetti. Sonymen qatar «Astana sazy» memlekettik folklorlyq ansambli men «Birlik» án-bı ansambli ónerlerin ortaǵa salyp, kórermenniń yqylasyna bólendi.
Jetisý dástúrli án mektebiniń ókili, belgili ánshi Ardaq Balajanova qara dombyranyń shanaǵynan saz quıqyljytyp, kómeıinen kesteli ún tókse, ile-shala Nurǵısa Tilendıevtiń «Aqqý» kúıi tartylyp, tizilgen bıshi qyzdardyń ónerimen úılesim tapty. Munan soń kúıshiler Qaırat Aıtbaev pen Edil Basyǵaraev kúı tartysqa túsip, boı shymyrlatty. Al Aıgúl Elshibaevanyń erekshe daýysy kórermendi baýrasa, dombyra men qobyzdyń kúı tartysyna tebirengen jurt qoshemetin bildirdi.
Eleýli jármeńkede esti óner ǵana áıgilendi, qunarly týyndylar ǵana qulaq quryshyna jetti. Ortalyqtyń óner maıtalmandary kórermen nazaryna ultymyzdyń áýelegen biregeı ánderin, kúmbirlegen kúı men jyr jaýharlaryn, tól ónerimizdiń úzdik úlgilerin pash etti.