Elimizde orta bilim beretin mektepte 400 myńdaı pedagog jumys istese, sonyń 19 paıyzy ǵana er-azamat. Sarapshylar «Mektepke aǵaılar aýadaı qajet» dep dabyl qaqqaly qashan. Al bastaýysh synyptaǵy pedagogter arasynan Ybyraı Altynsarınniń izbasaryn kezdestirý tipti qıyn. Biraq Astanada jas óskinge qalam ustatyp, partaǵa qalaı otyrýdan bastap úıretetin aǵaı bar. Onyń aty-jóni – Bekbolat Ýálı.
Jan-jaǵyna tańyrqaı qarap, júreksine mektep tabaldyryǵyn attaǵan balanyń aldynan aǵaıdyń shyqqany da birtúrli sııaqty kórine me? Joq. Eshqandaı da birtúrli emes eken. Buǵan Muqaǵalı Maqataev atyndaǵy №74 mektep-gımnazııaǵa barǵanda kózimiz anyq jetti. Mektep tabaldyryǵyn endi ǵana attaǵan otyz úıdiń erkesin tártipke baǵyndyryp, tárbıe men bilimdi qatar berip jatqan muǵalimdi kórgende ájeptáýir áserlenip qaldyq. «Álippedegi» áripterdi oıyn arqyly oqytyp, keıin suraq qoıyp, oǵan oqýshylar jamyraı jaýap berip jatty. Ne kerek, balalardyń bilimge degen qulshynysy tilinen de, túrinen de kórinip-aq tur.
«Mektepte júrgende-aq muǵalim bolsam dep armandaıtynmyn. Biraq bastaýysh synypqa sabaq beremin dep oılaǵan joqpyn. 2003 jyly Qostanaı pedagogıkalyq kolledjine qujat tapsyrar sátte osy mamandyqty tańdadym. Shekspırdiń áıgili sózi bar ǵoı, «Kitap maǵan taqtan da qymbat» degen. Sol sekildi jumysymdy eshqandaı qyzmetke aıyrbastaǵym kelmeıdi. О́z isińdi unatsań, onyń qıynshylyǵy da qyzyq bolyp kórinedi emes pe? On segiz jyldan beri bastaýysh synypqa jetekshilik etip kelemin. Shákirtterimniń aldyńǵy tolqyny ýnıversıtet támamdap, otbasyly bolyp úlgerdi. Olardyń ár jetistigi – meniń qýanyshym», deıdi Bekbolat aǵaı.
Iá, tarydaı bolyp kirgen jerden ıntellektýaldyq turǵydan taýdaı bolyp shyǵý jolynda birinshi synyptyń úles salmaǵy zor. Osy ýaqyt aralyǵynda oqýshy ózi baıqap úlgermeıtin birneshe jetistikke jetedi. Sóıtip, ár jyl saıyn shyńdalyp, qalyptasa kelip, on bir jyldan soń qanattanyp, altyn uıa mektebimen qoshtasady. Sondyqtan «bilimniń negizi – bastaýyshta» degen aqıqat sóz.
Júrek qalaýyn taýyp, jumysyn «mamandyqtyń tóresi» dep baǵalaıtyn Bekbolat aǵaı eńbek jolyn Qostanaı oblysynda bastapty. Keıin elordaǵa qyzmet aýystyrǵan. «Tobymyzdaǵy qyryq qyzdyń ortasynda tek eki jigit boldyq. Ekinshi jigit qazir basqa salada eńbek etedi. Er-azamattar kóbine bastaýysh synyptyń qıynshylyǵynan qashady. О́ıtkeni ár balany tańerteń kútip alyp, sabaqty yjdaǵattylyqpen oqytyp, túste kıindirip shyǵaryp salý rasynda ońaı emes. Qarapaıym qaǵıdalarmen birge bilim men tárbıeni qatar meńgertý naǵyz sheberlikti talap etedi», deıdi B.Meıramuly.
Oqýshylardyń eliktep, úlgi eter tulǵasy – qashanda muǵalim. Olar ustazynyń búkil is-qımylyna, júris-turysyna, sóıleý mánerine, adammen qarym-qatynasyna elikteıdi. Sondyqtan jaýapkershiligi mol, rýhanı dúnıesi baı pedagogter ǵana balanyń jan dúnıesine áser ete alady. Úzilis kezinde «Álippesin» qushaqtaǵan oqýshylarmen áńgimelesip, olardyń da oıyn bildik. «Balabaqsha da jaqsy, mektep te qyzyq. Búgin biz «S» dybysyn úırendik. «Syzǵysh» degen sóz eki býynǵa bólinedi. О́skende muǵalim bolamyn. Al bizdiń aǵaı tamasha», deıdi balalar.
«Bastaýysh synyp muǵalimi – eń jaýapty, qıyn da qyzyqty mamandyqtyń biri. Oǵan árkimniń júregi daýalamaıdy. Al endi osy salaǵa óziniń qulshynysymen kelgen Bekbolat Meıramulynyń eńbegi maqtaýǵa turarlyq. Balalardy uıymdastyrýy, qundylyqqa negizdelgen sabaq ótkizý ádisi bizdi erekshe tánti etti. «Balalarymyzdyń er muǵalimnen sabaq úırengeni qandaı jaqsy», dep ata-analar da qýanyshtaryn jasyrmady. О́ıtkeni qazir balany úıde de, balabaqshada da, mektepte de áıelder tárbıeleıdi. Sondyqtan tulymdary jelbirep, júrekteri lúpildep, bilim ordasyn endi attaǵan balaqaılarǵa er-azamattyń árip tanytyp, qalam ustatyp, kórkem jazýǵa baýlyǵany óte mańyzdy», deıdi mektep dırektorynyń orynbasary Lena Omarhanova.