Búgin, 6 qazanda Qazaqstanda AES salý boıynsha jalpyhalyqtyq referendým barysynda daýys bergen Memleket basshysy Qasym-Jomart Toqaev otandyq BAQ ókilderi úshin arnaıy brıfıng ótkizdi, dep habarlaıdy Egemen.kz.
Brıfıng barysynda «Egemen Qazaqstan» gazetiniń Saıasat jáne quqyq bóliminiń meńgerýshisi Orynbek Pazylov Prezıdentke «Halyqaralyq pándik olımpıadada jeńimpaz atanǵan daryndy oqýshylarǵa qoldaý kórsetken edińiz. Jas shahmatshylardyń árbir qadamyn da nazarda ustap, qoldap kele jatqanyńyzdy bilemiz. Mundaı qadamnyń astarynda qandaı mán bar?» degen saýal qoıdy.
«Máni tereń. Sebebi men jastardy qoldaımyn. Muny únemi aıtyp kelemin. Memleketimizdiń keleshegi – jastardyń qolynda. Ol jáı uran emes. Bul – bizdiń basty saıasatymyz. Sondyqtan keleshekte de biz jastardy qoldaımyz. Olarǵa járdem beremiz. Ásirese, daryndy jastardy qoldaýymyz kerek. Keshe ǵana muǵalimderge, ustazdarǵa marapat tabystadym. О́z sózimde muǵalimder bul qoǵamymyzdyń ozyq tulǵalary ekenin aıttym. Olar daryndy jastarǵa bilim berip jatyr. Sondyqtan jastardy da, olardy oqytyp jatqan muǵalimderdi de memleket qoldaıdy. Sonymen qatar men keshe ǵana ustazdar qoǵamymyzdyń basty keıipkeri bolýy kerek ekenin aıttym. Sondyqtan olarǵa járdem berip, ustazdardyń bedelin, qoǵamdaǵy mártebesin kóteremiz», dedi Prezıdent.