Memleket basshysy Qasym-Jomart Toqaev Prezıdent ortalyǵynda ornalasqan №211 referendým ýchaskesine baryp, AES qurylysyna qatysty respýblıkalyq referendýmda daýys berdi.
Prezıdent óz tańdaýyn jasaǵannan keıin otandyq buqaralyq aqparat quraldary ókilderine brıfıng ótkizdi. Memleket basshysy, eń aldymen, referendým týraly pikir bildirip, odan qandaı nátıje kútetinin aıtty.
– Búgin – tarıhı kún. Halqymyz AES salý máselesine qatysty daýys berip jatyr. Referendým – tikeleı demokratııanyń óte tıimdi tetigi. Halqymyz qandaı sheshim qabyldasa, memleketimizdiń túpki baılamy da solaı bolady. Nátıje oń bolady dep oılaımyn. Shyn máninde, bul – taǵdyrsheshti oqıǵa. Sondyqtan men referendýmdy qoldaımyn, – dedi Qasym-Jomart Toqaev.
Odan keıin Prezıdent «Referendým qorytyndysy boıynsha halqymyz AES salýdy qoldasa, onyń qurylysyn qaı el júrgizedi?» degen suraqqa jaýap berdi.
– Bul – ońaı másele emes. Úkimet taldaý jasap, tıisti kelissózder júrgizýge tıis. Meniń pikirimshe, Qazaqstanda eń ozyq tehnologııalary bar álemdik kompanııalardan quralǵan halyqaralyq konsorsıým jumys isteýi qajet. Qalǵanyn ýaqyt kórsetedi, – dedi Memleket basshysy.
Jýrnalıster Prezıdentten bıyl kóktemdegi alapat sý tasqynynan keıin qandaı qorytyndy jasalǵanyn surady.
– Tıisti qorytyndy jasaldy. Biraq mundaı tabıǵat apaty búkil jer sharynda oryn alyp jatqanyna basa mán berýimiz kerek. Jaqynda ǵana Ortalyq Eýropada alapat tasqyn ótti. Onyń aldynda AQSh pen Vetnamda daýyl boldy. Sondyqtan mundaı apattardy aldyn ala boljaý qıyn. Degenmen ondaı jaǵdaıǵa daıyn bolyp, qajetti sharalar qabyldaý mańyzdy. Qazaqstan eshkimniń kómeginsiz tasqynnyń saldaryn eńsere aldy. Muny ashyq aıtý kerek. Biz adam jáne qarjy resýrstaryn osy iske jumyldyrdyq. Úkimet pen ákimder belsendi jumys istedi. Onyń nátıjesin kórip otyrsyzdar. Alapat tasqyn kezinde zardap shekken azamattar jańa baspanamen qamtyldy. Men buǵan deıin eshkim nazardan tys qalmaıdy dep ýáde berdim. Jalpy alǵanda, biz bul maqsatty oryndadyq, – dedi Memleket basshysy.
Sodan soń «Egemen Qazaqstan» gazetiniń atynan Prezıdentke «Halyqaralyq pándik olımpıadalarda jeńimpaz atanǵan talantty oqýshylarǵa qoldaý kórsettińiz. Jas shahmatshylardyń árbir qadamyn nazaryńyzda ustap, qoldap kele jatqanyńyzdy bilemiz. Jalpy, bul qadamnyń astarynda qandaı mán bar?» degen saýalymyzdy qoıdyq.
– Máni – tereń. Sebebi men jastardy qoldaımyn. Muny únemi aıtyp kelemin. Memleketimizdiń keleshegi – jastardyń qolynda. Ol jáı uran emes. Bul – bizdiń basty saıasatymyz. Sondyqtan keleshekte de biz jastardy qoldaımyz. Olarǵa járdem beremiz. Ásirese daryndy jastardy qoldaýymyz kerek. Keshe ǵana muǵalimderge, ustazdarǵa marapat tabystadym. О́z sózimde muǵalimder bul qoǵamymyzdyń ozyq tulǵalary ekenin aıttym. Olar daryndy jastarǵa bilim berip jatyr. Sondyqtan jastardy da, olardy oqytyp jatqan muǵalimderdi de memleket qoldaıdy. Sonymen qatar men keshe ǵana ustazdar qoǵamymyzdyń basty keıipkeri bolýy kerek ekenin aıttym. Sondyqtan olarǵa járdem berip, ustazdardyń bedelin, qoǵamdaǵy mártebesin kóteremiz, – dedi Prezıdent.
Sonymen qatar brıfıng barysynda «Qazirgi Úkimettiń jumysyna kóńilińiz tola ma?» degen suraq qoıyldy.
– Meniń oıymsha, Úkimet belsendi jumys istep jatyr. Memleket basshysy retinde qoıǵan mindetterimdi oryndaýǵa tyrysady. Jumysymyz óte qaýyrt. Ol buqaralyq aqparat quraldaryna kórine bermeýi múmkin. Aqparattardy jan-jaqtan alyp otyramyn. Jalpy, men kóp oqıtyn adammyn. Sondyqtan eldegi barlyq oqıǵadan árqashan habardarmyn. Mınıstrlerdiń jáne Úkimettiń jumysynda kemshin ketip jatqan tustar bolsa, álbette, eskertemin. Jeti aı degen – kóp ýaqyt emes. Úkimet músheleri ózderin kórsetýi kerek. Eń basty mindet – el ekonomıkasynyń damýyna serpin beretin múmkindikterdi izdeý, – dedi Qasym-Jomart Toqaev.