Oblys ortalyǵy Taraz qalasyn kógaldandyrý, abattandyrý jumysymen aınalysatyn «Jasyl el – Taraz» kásipornynyń tehnıkalyq bazasyn arttyrýǵa jergilikti atqarýshy bılik aıryqsha nazar aýdaryp otyr. Keıingi jyldary seriktestiktiń tehnıkalyq bazasy túrli kólikpen tolyqty. Kásiporyn jumysynyń ónimdiligin arttyrý maqsatynda kúni keshe qala ákimdigi ujymǵa taǵy birneshe júk kóliginiń kiltin tabystady.
«Jasyl el – Taraz» kásipornynda tájirıbesi tolysqan mamandar jumys atqaryp jatyr. Olar qala tazalyǵyna janashyrlyqpen qaraıdy. Jumysshylardyń júzinen óz isine degen adaldyq baıqalyp turady. Oblys ortalyǵyn abattandyrý, kógaldandyrý, sanıtarlyq tazalyq jumysyn talapqa saı atqaryp júrgen ujymnyń eńbegi eseli ekenin erekshe atap ótken jón. Naqtyraq aıtar bolsaq, mekeme tarapynan shahardaǵy turmystyq qatty qaldyqtardy shyǵarý, saıabaqtar men skverlerdi, gúl baqtaryn, jaıaý júrginshi joldaryn kútip ustaý, qys mezgilinde qar tazalaý, muz qatpaý úshin joldarǵa qum, tuz sebý, tal egý jumysy júıeli túrde atqarylyp jatyr. Sondyqtan keıingi birer jyldyń bederinde seriktestikti jańa tehnıkalarmen qamtamasyz etý qolǵa alyndy», deıdi Taraz qalasynyń ákimi Baqytjan Orynbekov.
Shahar basshysynyń aıtýynsha, Taraz qalasynyń tazalyǵy jergilikti atqarýshy bıliktiń nazarynan tys qalmaıdy. Sol turǵyda «Jasyl el – Taraz» kásipornynyń tehnıkalyq bazasyn tolyqtyrý jumystary aldaǵy ýaqytta da jalǵasyn tabady.
Taraz qalasynyń ákimi B.Orynbekov bul kúni ujymǵa sý jańa toǵyz júk kóliginiń kiltin tapsyrdy. Qalalyq ákimdiktiń baspasóz qyzmeti keltirgen derekke júginsek, tabystalǵan tehnıkanyń jeteýi qoqys shyǵarýǵa arnalǵan «Kamaz-65115» markaly kólik bolsa, ekeýi qys mezgilinde jol shetindegi qardy tazalaýǵa arnalǵan «Amkodor-37» markaly tehnıka eken. Osylaısha, kásiporyndaǵy tehnıka tapshylyǵy jyl ótken saıyn azaıdy.
Derekterge júginsek, «Jasyl el – Taraz» kásipornyna ótken jyly 8 tehnıka berilipti. Eki jyldy qosa eseptesek, seriktestiktiń tehnıkalyq bazasy 17 kólikpen tolyqqanyn baıqaımyz. Árıne, qala tazalyǵyna jaýapty ujymǵa bul – úlken qamqorlyq.
«Oblys ortalyǵyn kógaldandyrý, abattandyrý jumystary ońaı sharýa emes. Ilgeride tehnıkanyń joqtyǵynan jumys baıaýlap qalǵan kez de boldy. Alaıda keıingi jyldary jergilikti atqarýshy bıliktiń qamqorlyǵymen jańa tehnıkalar alynyp jatyr. Bul seriktestiktiń jumysyna sony serpin beredi. Álbette, osy oraıda basshylarǵa aıtar alǵysymyz sheksiz», deıdi kásiporyn qyzmetkerleri.
Keıingi 2-3 jyldyń bederinde «Jasyl el – Taraz» kásipornynyń jumysy jandana tústi. Qala tazalyǵyna jaýap beretin ujymǵa jergilikti atqarýshy bılik tarapynan aıtarlyqtaı qoldaý kórsetilip jatqany kóńil qýantady.
Taraz qalasy