Elimizdiń jıhaz ónerkásibiniń ınvestısııalyq portfeli quny 17 mlrd teńgeden asatyn 9 jobany qamtıdy. Olardy iske asyrý arqyly shamamen 1000-ǵa jýyq jumys orny ashylmaq. Bul týraly «QazIndustry» Indýstrııa jáne eksport ortalyǵynyń jobalardy iske asyrýǵa monıtorıng júrgizý jáne taldaý dıreksııasy habarlady.
Atalǵan jobalardyń ishindegi quny 9,2 mlrd teńge bolatyn 4 joba bıyl Túrkistan oblysynda iske qosyldy. Jańa óndirister 375 adamdy jumyspen qamtydy. О́nimderdiń negizgi bóligi ishki naryqqa baǵyttalǵan.
Budan bólek, jyl sońyna deıin Pavlodar oblysynda bir jobany iske qosý josparlanyp otyr. Quny 388 mln teńge bolatyn keńse men mektep jıhazdaryn óndirý jobasy aıasynda shamamen 30-ǵa jýyq jańa jumys orny ashylady dep kútiledi.
Júzege asyrý kezeńinde Shymkent qalasynda quny 800 mln teńgeni quraıtyn 3 joba bar. Olardyń ishinde jıhaz, medısınalyq jıhaz ben metall shkaftar óndirisi bar. Bul nysandardyń ashylýy 102 adamdy jumyspen qamtamasyz etýge múmkindik beredi. Jańa kásiporyndar óniminiń 9%-ǵa jýyǵyn alys-jaqyn shetelderge eksporttaý josparlanyp otyr.
Sonymen qatar Abaı oblysynda jalpy quny 7,5 mlrd teńgege, 530 jańa jumys orny qurylatyn korpýstyq keńse jıhazyn óndirý jobasyn iske asyrý josparlanǵan. Jobanyń negizgi ınvestory – Qytaı Halyq Respýblıkasy. Osylaısha, josparlanǵan 5 jobany iske asyrý barysynda jıhaz ónerkásibiniń negizgi kapıtalyna taǵy 8 mlrd teńgege jýyq ınvestısııa tartylady.