Dzıýdodan álem chempıonaty elimizde ótedi

Joǵarydaǵy jańa­lyqty barsha qazaq jankúıerleri jyly qabyldady. Sebebi, bul jarys Olımpııa oıyndary qarsańynda ótedi. Iаǵnı tórtjyldyqtyń bas­ty dodasyna qatysatyn dzıýdo kúresiniń has sheberleriniń basym bóligi dál osy baıraqty báseke barysynda anyqtalady. Bul jaǵdaı bizdiń komandaǵa 2028 jyly Los-Andjeleste alaýy tutanatyn ja­rysqa tolyq quramda attanýǵa tamasha múmkindik týyndatyp otyr.

2015 jyldyń tamyz aıy­nyń sońǵy kúnderi álem chempıona­tynyń Astanada dúrkirep ótkeni áli esimizde. Sol kezge deıin elimizdiń dzıýdoshylary dúnıe­júzilik dodada nebári bes júlde ǵana alǵan edi. Tarqatyp aıtsaq, 2001 jyly Mıýnhendegi maıdanda qos Ashat – Jıtkeev pen Shaharov qola medaldy moıyndaryna ildi. 2009 jyly Rotterdamda Maksım Rakov altyn alsa, 2011 jyly Parıjde kúmispen kúpteldi. 2013 jyly Rıo-de-Janeıroda Azamat Muqanov fınalǵa deıin alqynbaı jetip, fınalda Ja­po­nııanyń dańqty balýany Ma­sashı Eıýýnımaǵa ese jiberdi.

Astanadaǵy jarysta asa jeńil salmaqta kúresken qazaqtyń eki birdeı altyn asyqtaı azamaty – Eldos Smetov pen Rýstam Ybyraev bas júldeni ózara sarapqa saldy. Bul tartys Eldostyń paıdasyna sheshi­lip, ol álem chempıony atansa, Rýs­tam kúmis medaldi qa­naǵat tutty. Buryn-sońdy jahan­dyq jarystyń fınalynda qan­dastarymyz bir-birimen beldesken emes. Sol kezde jeńis tuǵyrynda qos qazaqtyń qatar turǵanyn kórgende, qýanbaǵan, shattanbaǵan, marqaımaǵan, keýdesin maqtanysh sezimi kernemegen jankúıer joq shyǵar, sirá!

Elimizde ótken álem chempıo­naty el dzıýdosynyń damýyna tyń serpin berdi. Tatamıdegi tabysymyz eselenip, kóptegen dúbirli dodada oljaǵa keneldik. Sodan bergi toǵyz jyl aralyǵynda Otgonseseg Galbadrah (2017, 2018 jyldary qola), Erlan Serikjanov (2018 jyly kúmis), Eldos Smetov (2019, 2022 jyldary qola), Ǵusman Qyrǵyzbaev (2021 jyly kúmis), Ábıba Ábýjaqynova (2022, 2024 jyldary qola) álem chempıonatynda júldeli oryndardy ıelendi. Oǵan Olımpııa oıyn­dardaǵy tabystarymyzdy qo­syńyz. Sál erterekte, 2008 jyly Beıjińdegi básekede Ashat Jıt­keev kúmiske qol jetkizse, 2016 jyly Rıo-de-Janeıroda Eldos kúmis, Otgonseseg qola medalǵa ıe boldy. 2021 jyly Tokıoda Smetov qola medaldy qorjynǵa saldy. Al bıyl Parıjde Eldos tarıhta qalatyndaı taǵy bir úlken is tyndyrdy. Tarazdyń tarlany eldiń dzıýdoshylary arasynan shyq­qan tuńǵysh Olımpıada chempıony retinde óz esimin sporttyq she­jirege altyn áriptermen jazdy. Ǵusman qola júldeni oljalady. Nátıjesinde jerlesterimiz jalpy komandalyq esepte jetinshi orynǵa taban tiredi.

Mine, endi 2027 jyly tórtkúl dúnıeniń dzıýdoshylary qaıta qazaq topyraǵynda bas qosqaly jatyr. Atalǵan jarys qaı qalada ótetini áli naqtylanǵan joq. Asta­na ma, álde Almaty ma? Biraq ol ma­ńyzdy emes. Eń bastysy, dzıýdo dese delebesi qozyp, qany qyzatyn myńdaǵan qazaq jan­kúıerine osy keremet sporttyq sharany kórýge tamasha múmkindik týyndap otyr.

Bul kúnderi Almas Alsenov esimdi qazaqtyń isker jigiti Halyq­aralyq dzıýdo federasııa­synda laýazymdy qyzmet atqarady. Ol «IJF» prezıdentiniń keńesshisi. Iаǵnı Marıýs Vızerdiń oń qoly dep aıtsaq ta bolady. Almastyń ózi de kezinde jaqsy kúresken. Birqatar halyqaralyq jarysta jeńis tu­ǵyryna kóte­rilip, elimizdiń ult­tyq qura­masy sapynda óner kórsetti. Keıin­nen Qazaqstan dzıýdo fe­derasııasynyń vıse-prezıdenti, Azııa dzıýdo odaǵynyń marketıng jónindegi dırektory, Eýropa dzıýdo odaǵy prezıdentiniń keńesshisi qyzmetterin abyroımen atqardy. Búginde ol «IJF»-ta eń­­bek etedi. Ál­senovtiń osyndaı beldi uıymda bas­shylyq qyzmet atqarǵanynyń paıdasy Parıj Olımpıadasy barysynda anyq baıqaldy. Jany ár kez ádil­dikti qalaıtyn qandasymyz tórt­jyldyqtyń basty dodasynda otandyq dzıýdoshylarymyzdyń birde-bireýine qııanat jasalýyna jol bermedi. Mine, endi Almas Jeńisuly álem chempıonatynyń qaıta qazaq topyraǵyna oralýy­na súbeli úles qosyp otyr.

Joǵaryda aıtylǵan jaǵymdy jańalyqty estigen bette bul kúnderi Shveısarııada turyp jat­qan «IJF» prezıdentiniń keńes­shisimen habarlastyq. «Álem chem­­pıonatynyń elimizde uıym­dastyrylýy óte mańyzdy oqıǵa. Onyń ústine, bul jarystyń jalaýy Olımpııa oıyndary qarsa­ńynda jelbireıdi. Sonymen qatar elimizde Halyqaralyq dzıýdo aka­demııasynyń (IJF Acadey) fılıalyn ashý jóninde kelisimge qol qoıdyq. Ol jerde balýandardyń esh alańsyz daıarlanýǵa barlyq jaǵ­daı jasalýymen qatar, ǵylym men medısınany da qatar alyp júrý kózdelip otyr. Oǵan da aı­ryqsha mán beriledi. Semınarlar men trenıngter ótip, tóreshiler men bapkerlerdiń biliktiligin arttyrýǵa arnalǵan arnaıy kýrstar uıym­dastyrylady. Basqa da tolyp jatqan sharýalar bar. Sonyń barlyǵy da Akademııada júzege asyrylady. Osy is-sha­ralar Memleket basshysy Qasym-Jomart Toqaevtyń sport sala­synda júıeli ózgerister engizý jónindegi tapsyrmasymen tolyqtaı úılesedi. Bul joba – sporttyq ınfra­qurylymdardy modernızasııalaý, joǵary dáre­jeli mamandardy daıarlaý týraly baǵdarlamany oryndaýdyń birden-bir joly. Sóz oraıy kelgende, osy jobamyzdy qoldaǵan Týrızm jáne sport mınıstri Erbol Myrzabosynov myr­zaǵa zor alǵysymdy bildirgim keledi», – deıdi Almas Álsenov.