«Aýyldyń kórki azamatynan» deıtin sózdiń jattandy bolsa da jany bar. Qyzyljar aýylynyń damýyna 2,6 mlrd teńge qarajat baǵyttalyp, kóp-kórim kórkeıip qaldy.
Qarqyndy damyp, kórki kelise bastaǵan aýyldyń saltanatty reńi kóz qyzyqtyrarlyq. Mol qarajattyń esebinen medısınalyq ortalyq, tigin sehy, kópbeıindi keshen salynyp, aýyl turǵyndaryna qaltqysyz qyzmet etip tur. Basy aýyryp, baltyry syzdaǵandarǵa qyzmet etetin zamanaýı medısınalyq ortalyqta qajetti qural-jabdyqtarmen qamtamasyz etilgen emdeý, rentgen kabınetteri jáne kúndizgi stasıonar bar. Adamdar endi sabylyp alysqa barmaı-aq, osy jerdiń ózinde sapaly em qabyldaı alady.
Al medısınalyq kıim tigetin sehtyń ashylýy ondaǵan jumys ornyn quryp, adamdardyń turaqty jumyspen qamtylýyna táp-táýir septigin tıgizip otyr. Bir aýysymda 500 kıimge deıin tige alady.
Týǵan aýylynyń tútinin túzý ushyrýǵa bel býa kirisip, birtalaı irgeli is atqaryp tastaǵan kásipker zamanaýı sýpermarket, bilim jáne shyǵarmashylyq ortalyq ornalasqan keshen saldy. Qazir ortalyqqa 200-ge jýyq bala barady. El erteńi sanatyndaǵy jasóspirimder rýhanı qazynanyń ortalyǵyna aınalǵan keshendegi bı, sport, kórkemónerpazdar úıirmelerine qatysyp, shahmat, doıby oınaıdy. Osy arada dál osyndaı qamqorlyq bar jerdegi aýyl balalarynyń qala balalarynan synyq súıem kem qalmaı, damyp, jan-jaqty ósýine mol múmkindik týyndap otyrǵandyǵyn ekpin túsirip aıta ketsek, artyq bolmas. Osyndaı jaǵdaıǵa jetý kásipker qamqorlyǵynyń arqasynda múmkin bolyp otyr.
Aldaǵy ýaqytta da kórki kelisken Qyzyljar aýyly jan-jaqty damyp, kemeldene túspek. Eldi mekende fıtnes ortalyǵy, monsha, saýyqtyrý kesheni, dámhana, naýbaıhana, medısına qyzmetkerlerine arnalǵan kóppáterli turǵyn úı kesheni salynyp jatyr. Osynyń barlyǵy tolyq júzege asqan kezde aýyl jer betindegi jumaq ispetti ystyq uıaǵa aınalmaq. Bul istiń tárbıelik te máni bar. Aýylǵa jany ashıtyn azamattyń qanshalyqty eńbegin sińirip jatqanyn kózimen kórgen jas tolqyn da erteń aldyńǵy býyn aǵalardyń izimen júrip, darqan dala tósinde ózderiniń ónegeli izin salary sózsiz.
«Mels» seriktestiginiń bas dırektory Erlan Súleımenov aldaǵy ýaqytta kásibı tehnıkalyq kolledj, 150 oryndyq balabaqsha, jumysshylarǵa arnalǵan jataqhana, kınoteatry bar mádenıet úıi, ulttyq naqyshtaǵy qonaqúı keshenin salmaq. Osyndaı sáýletti ǵımarattar arhıtektýralyq úılesimmen boı kótergen kezde Qyzyljar aspanyndaǵy juldyzdar da yntymaǵy jarasqan irgeli eldiń ústine súıispenshilik sáýlesin quıyp turary daýsyz.
Kásipker dárilik preparattardy qaıta óńdeıtin fabrıka qurylysyn bastaýdy da josparlap qoıǵan. Oıǵa alǵan sharýasy ońynan ońǵarylsa, aýylda qanshama jumys orny ashylyp, áleýmettik-turmystyq jaǵdaı ońala túspek. Aýyl ınfraqurylymyn odan ári damytý maqsatynda bes satyly tazartýmen káriz-tazartý qurylystary da qolǵa alynbaq. Osylaısha, tirek aýyldardyń birine aınalǵan Qyzyljar bolashaq keńistigine erkin enetin eńseli eldiń qataryna kiredi. Osynyń barlyǵy el ıgiligine aınalyp jatqan ınvestısııanyń sybaǵasy.
Aqmola oblysy,
Selınograd aýdany