Búgin Densaýlyq saqtaý mınıstri Aqmaral Álnazarova men Oqý-aǵartý mınıstri Ǵanı Beısembaev Astanadaǵy №95 mektep-lıseıine baryp, oqýshy densaýlyǵyn saqtaýdyń birqatar máselelerin talqylady, dep jazady Egemen.kz.
Vedomstvo basshylary mektep ashanasyn aralap, sanıtarııalyq-gıgıenalyq normalardy saqtaý maqsatynda tamaq daıyndaý sharttarymen tanysty.
Aqmaral Álnazarova mekteptegi tamaqtaný standarttary qaıta qaralyp jatqanyn málimdedi. Jańa biryńǵaı mázirde balalar organızminiń fızıkalyq jáne psıhıkalyq damýyna qajet rasıon basty nazarǵa alynady.
Kezdesý barysynda 1000-nan astam oqýshysy bar mektepterde stomatologııalyq kabınetterdi ashý máselesi talqylandy.
«Búgingi tańda 6 óńirde 98 kabınet jumys isteıdi. Stomatologııalyq kabınette qabyldaýdy dantıstter júrgizedi. Biraq odan ári «Saý tispen bolashaqqa» jobasynyń sheńberinde mektep jasyndaǵy barlyq balalardy stomatologııalyq aýrýlardyń profılaktıkasymen kezeń-kezeńimen qamtamasyz etý josparlanyp jatyr», delingen Densaýlyq saqtaý mınıstrligi taratqan aqparatta.