29 qyrkúıek pen 5 qazan aralyǵynda Shymkent qalasynda halyqaralyq týrnır ótti. Bokstan Qazaqstan erler quramasynyń bas bapkeri Qaırat Sátjanov jarysty qorytyndylap, sharshy alańǵa shyqqan boksshylardyń ónerin baǵalady, dep jazady Egemen.kz Olympic.kz-ke silteme jasap.
Qaraqozy Ábdálıevti eske alýǵa arnalǵan týrnır jeńimpazdary Iordanııada ótetin Azııa chempıonatynda baq synaıdy. Keı salmaq boıynsha sportshylardyń saıys barysynda jaraqat alýyna baılanysty ashyq sparrıng ótýi múmkin.
Qaırat Sátjanov halyqaralyq týrnır joǵary deńgeıde ótkenin aıtty.
«Týrnırge 140 sportshy qatysty. Saıysqa olımpıada, álem chempıonatynyń júldegerleri de qatysty.
Temirtas Júsipovtyń daıyndyǵy jaqsy boldy. Sanjar Táshkenbaı da babynda óner kórsetti. Ekeýi de 48 kelige deıingi salmaqta kezdesýi kerek edi. Biraq jaraqat saldarynan Sanjar jarystan shyǵýǵa májbúr boldy. Damır Ábdiqadyr, Danııal Sábıt jaqsy judyryqtasty. Nursultan Altynbek te óte myqty boldy. Orazbek Asylqulovqa keler bolsaq, ár keshte arnaıy topta ótken jıynda oǵan «5+» degen baǵa berdim», dedi Qaırat Sátjanov.
Bas bapker Parıj olımpıadasynda el namysyn qorǵaǵan Qamshybek Qońqabaev, Aslanbek Shymbergenov pen Nurbek Oralbaıdyń bul týrnırge nege qatyspaǵanyn túsindirdi.
«Olar týrnırge jaraqattary bolǵan soń qatyspady. Al jaraqattarynan emdelý úshin uzaq ýaqyt qajet bolyp tur. Máselen, Nurbek Oralbaı murnyna ota jasatýy qajet. Ol áli biraz ýaqyt sharshy alańǵa shyqpaıdy dep oılaımyn. Dese de jattyǵý jıyndaryna qatysady. Sparrıngke ázirge shyǵarmaımyz. Barynsha muqııat, saq bolý kerek. Qamshybektiń omyrtqasynda jaryq bar. Aslanbek te em alyp jatyr. Sondyqtan biz olarǵa jıyndar men aldaǵy saıystarǵa qatyspaýǵa ruqsat berdik», dedi bas bapker.