Qazaqstan Respýblıkasynyń Ulttyq pavılony Mádenıet jáne aqparat mınıstrliginiń qoldaýymen alǵash ret bedeldi kórmede usynyldy, dep habarlaıdy Egemen.kz.
60-shy Venesııa bıennalesinde «Jerūiyq: kókjıekten tys kózqaras» qazaqstandyq pavılonyna halyqaralyq synshylar jaǵymdy pikir bildirdi.
Jerūiyq – búginge deıin aýyzdan-aýyzǵa tarap, urpaqtan-urpaqqa jetken qazaq ańyzy boıynsha «qutty mekendi» izdeý. Ekspozısııada fýtýrıstik kókjıekter men qazirgi portaldan bólek ólshemge deıingi qııal álemi usynylǵan.
«Qazaqstanǵa óz ónerin kórsetý óte mańyzdy. Tarıh pen qazirgi zamandy ushtastyrý ıdeıasy men tujyrymdamasy qyzyqty jáne maǵan unady», dedi germanııalyq art-synshy ári sýretshi Valerııa Abentrot.
Qazaqstan pavılonyn kópshilik jyly qabyldady. Oǵan pavılonnyń biregeı tujyrymdamasy men qazaqstandyq sýretshilerdiń urpaqtar sabaqtastyǵy baıqalatyn erekshe jumystary sep boldy. Mysaly, ótken onjyldyqty beıneleıtin Kámıl Mýllashev pen Erbolat Tólepbaıdyń jumystary, Sáken Narynov pen Sergeı Maslovtyń zamanaýı dıalogy qazaqstandyq ónerdiń modernızmnen jańa medıaǵa deıingi evolıýsııasyn kórsetedi.
The2vvo sýretshiler tobynyń «Qatysý» saýnd-ınstallıasııasy men Anvar Músirepovtiń «Alastaý» beıne essesi sııaqty dástúrdi jańa medıamen úılestiretin jumystar kópshiliktiń nazaryn aýdardy. Bul bıennaleniń negizgi tujyrymdamasy kóshi-qon máseleleri men mádenı plıýralızm taqyrybyn kórsetedi.
«Birinshiden, maǵan qatty áser etken nárse – sizder ata-babanyń dástúrin jalǵastyryp, sonymen birge ony qazirgi zamanmen ushtastyra alatyndaryńyz. Sizder sonyń ortasyn taba bildińizder. О́tken men bolashaqty úılestire otyryp, alǵa umtylyp jatyrsyzdar. Munyń nátıjesi keremet bolady. Bul úlken jetistik, óıtkeni Batysqa jetpeıtini osy», dedi Egıpet jáne Soltústik Afrıkadaǵy ıtalııalyq radıotelevızııa bıýrosynyń jetekshisi Mark Innaro.
Dástúrli qazaq ıirimderi men zamanaýı kórkemdik tájirıbelerdiń erekshe úılesimi synshylardyń ǵana emes, jalpy jurtshylyqtyń qyzyǵýshylyǵyn týdyrdy. Pavılon jumys istegen kúnderi kelýshiler sany artyp, jobany talqylap, pikir bildirgenderdiń de qarasy kóp boldy.
Aıta keteıik, qazaqstandyq sýretshilerdiń óner kórmesine qatysýy «ViledFASHION» JShS bas demeýshisiniń, «Qazaq oil» JShS, «Universal Energy Kazakhstan» JShS qoldaýymen uıymdastyryldy.
Navale murajaıynyń tarıhı ǵımaratynda ótip jatqan 60-shy Venesııa óner bıennalesinde qazaqstandyq pavılon 24 qarashaǵa deıin jumys jasaıdy.