Jaıyq óńirinde gaz tapshy

Oblystyq energetıka jáne turǵyn úı-kom­mý­naldyq sharýashylyǵy bas­qarmasynyń basshysy Mıras Múlkáı óńirlik kommýnıkasııalar qyzmeti alańynda ótken brıfıngte óńirde qalyptasqan jaǵdaıǵa túsinik berdi. Batys Qa­zaq­stan oblysynyń ishki naryǵyna suıytylǵan munaı gazyn jetkizýmen 19 nysan aınalysady. Oblys aýmaǵynda jalpy sany 109 gaz quıý stansasy bar. О́ńirdiń ortasha aılyq suıytylǵan gazdy tutyný mólsheri – 4000-4500 tonna.

Batys Qazaqstan oblysyna tórtinshi toqsanda 11 566 tonna suıy­tylǵan munaı gazyn jetkizý josparlanǵan eken. Sonyń ishinde qazan aıynda – 3510 tonna, qarashada – 4030 tonna, jeltoqsan aıynda 4026 tonna jetkizý kózdelgen. Alaı­da 14 qarasha kúngi jaǵdaıǵa qaraǵanda «Jaıyq­munaı» JShS qazan aıyndaǵy josparyn nebári 41% oryndap, 1442 tonna ǵana gaz bergen.

– 1-25 qazan aralyǵynda Atyraý munaı óńdeý zaýy­ty ýaqytsha jóndeýge jabyldy. Osyǵan baılanysty Ener­­­ge­tıka mınıstrligi Atyraý oblysyna qajetti gaz kóle­miniń bir bóligin, ıaǵnı 2490 tonna ónimdi «Jaıyq­munaı» kompanııasynan alýǵa sheshim shyǵarǵan. Al bul kom­panııa táýligine 220 tonna ǵana suıyq gaz jónel­te alady. Qazir osy gazdyń 120 tonnasy – Batys Qazaqstan obly­­syna, 100 tonnasy – Atyraý oblysyna jetkizilip jatyr, – dep túsindirdi Mıras Múlkáı.

Mine, óńirdegi gaz tapshy­lyǵy, keıbir gaz quıý stansalarynda talon paıda bol­­ǵany sondyqtan eken. Buǵan qosa, sońǵy kezde óńirde suıytylǵan gaz otynymen júretin kólik kóbeıip ketken. Polısııa departamentiniń máli­me­tin­she, ótken jyly gaz jabdyǵy ornatylǵan kólik sany 15 650 bolsa, bir jyl ishinde ol 30 paıyzǵa artyp, 22 432-ge jetken.

«Osy oqıǵalardyń sebebi­nen suıytylǵan gaz quıý stan­sa­la­rynda kezek kóbeıip, keı jerde talon paıda boldy. Biraq bul ýaqytsha jaǵdaı. Qazir Energetıka mınıstr­ligi qosymsha suıytylǵan munaı gazynyń qajetti kóle­min basqa kózderden bólý máse­lesin qarastyryp jatyr», dedi bas­qarma basshysy.

Batys Qazaqstan oblysy