Ulttyq mereke – Respýblıka kúni qarsańynda «AMANAT» partııasy Ortalyq apparatynyń ǵımaratynda kólemi 24-te 12 metrdi quraıtyn Memlekettik Tý ilindi, dep habarlaıdy Egemen.kz.
«Amanat» partııasynyń baspasóz qyzmetiniń málim etýinshe dál osyndaı kólemdi Tý ǵımarattyń qasbetine alǵash ret ilinip otyr. Partııalyqtardyń aıtýynsha, aspan tústes Kók baıraq adamdardyń boıynda patrıotızm men óz eline degen maqtanysh syndy eń izgi sezimderdi oıatady.
«Amanat» partııasynyń «Jastar Rýhy» jastar qanaty osymen 3 jyl qatarynan Qazaqstan Respýblıkasynyń Memlekettik Týyn nasıhattaýǵa baǵyttalǵan «Meniń Elim – meniń Týym» aksııasyn ótkizip keledi. Bıyl aksııa aıasynda el aýmaǵynda 10 myńnan astam Memlekettik Tý ilinedi. Oǵan depýtattar, qoǵam qaıratkerleri, belsendi jastar jáne barsha nıet bildirýshi adamdar qatysady.
«Jastar Rýhynyń» tóraǵasy Aqerke Iskanderova bul aksııa 1990 jylǵy 25 qazanda qabyldanǵan memlekettik egemendik týraly Deklarasııa Táýelsizdigimizdiń bastaýy bolǵanyn eske salýǵa arnalǵanyn atap ótti.
«Belsendilerimiz el aýmaǵyndaǵy turǵyn úıler men áleýmettik nysandarǵa Kók baıraǵymyzdy ilip jatyr. 25 qazanǵa deıin bas-aıaǵy 10 myńnan astam Tý ilý josparlanyp otyr. Atalǵan aksııanyń basty maqsaty – el azamattary arasynda patrıottyq sezimdi oıatý. Memlekettik Týymyzǵa qaraǵan saıyn keýdemizdi óz elimizge degen maqtanysh sezimi kerneıdi. Biz Týdy «AMANAT» partııasynyń ǵımaratyna ildik. Ol túrli mádenı is-sharalarda, ulttyq quramalarymyzdyń matchtarynda, tipti jýyrda 5-shi Dúnıejúzilik kóshpendiler oıyndary aıasynda ótken Dımash Qudaıbergenniń konsertinde jelbiredi. Kók baıraǵymyz elordanyń qaq ortasynda 25 qazanǵa deıin ilinip, el turǵyndaryn qýantady», dedi ol.
Aıta ketsek, aksııaǵa barlyq nıet bildirýshiler qatysa alady. Ol úshin áleýmettik jelilerde #republicday #menińtýym, #menińelimmenińtýym heshtegterimen Memlekettik Tý aıasynda túsken óz fotosýretińizdi nemese otbasyńyzdyń fotosýretin ornalastyrý jetkilikti.