Elimizdiń saıası, áleýmettik-ekonomıkalyq damýyna eleýli úles qosqany jáne belsendi qoǵamdyq qyzmeti úshin Memleket basshysynyń Jarlyǵymen birqatar qoǵam qaıratkeri memlekettik nagradalarmen marapattaldy.
Ulttyq mereke – Respýblıka kúni qarsańynda Memlekettik keńesshi Erlan Qarın Ulttyq quryltaıdyń, Qazaqstan Respýblıkasy Prezıdentiniń janyndaǵy Jastar saıasaty jónindegi keńestiń birqatar múshesine, aımaqtan kelgen qoǵam belsendilerine memlekettik nagrada tapsyrdy.
Atap aıtqanda, «Parasat» ordenimen Ulttyq quryltaıdyń múshesi, Túrkistan oblystyq qoǵamdyq keńesiniń tóraǵasy Baıdildá Jylqyshıev marapattaldy.
Al Ulttyq quryltaıdyń, Batys Qazaqstan oblystyq qoǵamdyq keńesiniń múshesi Baýyrjan Ǵubaıdýllın, M.О́temisov atyndaǵy Batys Qazaqstan ýnıversıtetiniń dosenti Jańabek Jaqsyǵalıev, Qostanaı avtomobıl kóligi kolledjiniń dırektory Dmıtrıı Pavlenko «Qurmet» ordeniniń ıegeri atandy.
Sondaı-aq Shyǵys Qazaqstan oblysy Azamattyq alıansynyń tóraǵasy, oblystyq koǵamdyq keńestiń múshesi Aıaýjan Áshimova men Shyǵys Qazaqstan oblysy Ulan aýdanyndaǵy Qasym Qaısenov atyndaǵy orta mekteptiń dırektory Ásem Chamkaevaǵa «Eren eńbegi úshin» medali tapsyryldy.
Prezıdent janyndaǵy Jastar saıasaty jónindegi keńestiń músheleri – dintanýshy, dinı ekstremızmge qarsy is-qımyl jónindegi sarapshy Elnar Berikbaev, «Qoǵamdyq kelisim» ınstıtýtynyń dırektory Elına Masagýtova, qoǵam belsendisi Ǵalymjan Myrzabaev, sondaı-aq Qazaqstannyń Azamattyq alıansynyń atqarýshy dırektory Murat Omashev «Shapaǵat» medalimen marapattaldy.
E.Qarın Táýelsizdik pen egemendiktiń, barsha azamattyń berekeli birligi men yrysty yntymaǵynyń jarqyn rámizi sanalatyn ulttyq mereke – Respýblıka kúnimen marapat ıelerin quttyqtady.