Respýblıka kúni qarsańynda Aqmola oblysynda taǵy da eki jańa jaıly mektep paıdalanýǵa berildi. Qabanbaı batyr aýylynda aq túıeniń qarny jarylǵan oqıǵa oryn aldy.
Bilim oshaǵy 1 200 oqýshyǵa laıyqtalǵan. Jańa modıfıkasııadaǵy kabınetter, aýmaǵy atshaptyrym, keń de jaryq sport zaldary, STEM-zerthana, ashana, kitaphana, sport alańy jáne basqa da kóptegen múmkindik qarastyrylǵan.
– Aldaǵy toqsannan bastap 800-den astam oqýshy bilim ala bastaıdy. Mektep osy aýyl turǵyndarynyń ǵana emes, jaqyn mańdaǵy eldi mekenderdegi balalarynyń da bilim alýyna múmkindik týdyratyn ortalyqqa aınalady, – dep atap ótti mektep-lıseıdiń dırektory Rústem Jahın.
Jaǵymdy jańalyq aýyl turǵyndaryn erekshe qýanyshqa bólep otyr. Olar baýyr eti balalarynyń zaman talabyna saı bilim alýyna múmkindik týǵyzǵan memleket tarapynan jasalyp otyrǵan qamqorlyq dep qabyldaıdy.
– Jaıly mektep kókiregimizde júrgen armanymyz edi. Búgin sol armanǵa qolymyz jetip otyr. О́z basym 23 jyl mektep dırektory bolyp qyzmet ettim. Aýyl mektebi men qala mektebiniń birdeı bolýy – ata-analardyń eń basty tilekteriniń biri, – deıdi Svetlana Lýzanova.
Oblys ákimi Marat Ahmetjanov jańa oqý jylynda óńirde 8 mektep ashylǵanyn, olardyń altaýy oryn jetispeýshiligi máselesin sheshý jáne oqýshylarǵa qolaıly jaǵdaı jasaý maqsatynda ulttyq joba aıasynda salynǵanyn atap ótti.
– Memleket basshysy Qasym-Jomart Toqaevtyń bastamasymen bizdiń óńirde jaıly mektepter ashylyp otyr. Bilim oshaqtarynyń jaǵdaıy qala mektepterinen kem emes. El bolashaǵy – bilimdi jáne jan-jaqty damyǵan balalardyń qolynda, – dep atap ótti oblys ákimi.
Dál osyndaı bilim oshaǵy osy aýdandaǵy Qarajar aýylynda jumys isteı bastaıdy. Qos qýanysh aýyl turǵyndarynyń kókiregine rızashylyq sezim uıalatyp otyr.
Aqmola oblysy,
Selınograd aýdany