Batys Qazaqstan oblysynyń Bórli aýdanynda Respýblıka kúni qarsańynda birneshe áleýmettik nysan jańadan salynyp, paıdalanýǵa berildi.
Sonyń biri – Jarsýat aýylynda salynǵan 108 oryndyq jańa mektep. Ol óńirdegi «Qarashyǵanaq Petroleým Opereıtıng B.V.» kompanııasynyń tapsyrysymen, óńirdiń ınfraqurylymyn damytýǵa arnalǵan áleýmettik ınvestısııa arqyly júzege asty. Kompanııa dırektorynyń orynbasary Muhtar Mánkeevtiń aıtýynsha, bul keıingi eki jylda kompanııanyń shalǵaı aýyldarda salǵan on besinshi mektebi eken. Mekteptiń qurylys-montaj jumysyn merdiger «Qaldyǵaıty» JShS júrgizdi.
Bórli aýdanynda taǵy da birneshe ǵımarat – Qaraǵandyda feldsherlik-akýsherlik pýnkt, Aqsý aýyldyq okrýgine qarasty Jańaqonys aýylynda medısınalyq pýnkt ashyldy. Aýyl turǵyndaryn qýanyshqa bólegen áleýmettik nysandardyń ashylý saltanatyna oblys ákimi Narıman Tóreǵalıev, orynbasary Baqytjan Narynbetov, aýdan basshylary qatysty.
Qos medısınalyq nysan da «Aýylda densaýlyq saqtaýdy jańǵyrtý» qanatqaqty ulttyq jobasy aıasynda salynǵan. Oblys ákimi aýyldyq jerlerde medısınalyq kómek kórsetý sapasyn arttyrý maqsatynda qolǵa alynǵan bul joba bolashaqta da jalǵasatynyn, Qaraqudyq, Jańaqonys, Oblavka, Aqsý, Aqbulaq aýyldarynda da medısınalyq pýnktter salý qarastyrylǵanyn aıtty.
Saltanatty is-shara barysynda Aqsý, Keńtúbek, Prıýralnoe, Býmakól, Ýspenovka, Qaraǵandy aýyldarynyń medısına qyzmetkerlerine jańa jedel járdem kólikteriniń kilti tabystaldy.
Batys Qazaqstan oblysy