Oral qalasynyń 12 jasar turǵyny Zereni ushaqqa mingizbeı Astana áýejaıynda jalǵyz qaldyrǵan áýe kompanııasyna qatysty sot otyrysy aıaqtalyp, qyzdyń otbasynyń paıdasyna sheshim shyǵaryldy, dep habarlaıdy Egemen.kz.
- Sot «Air Astana» áýe kompanııasyn Zereniń anasyna moraldyq shyǵyn retinde bes mıllıon teńge ótemaqy tóleýge mindettedi, - dep málimdedi otbasynyń advokaty Danılhan Shagataev.
Oqıǵa 2024 jyldyń 21 shildesinde oryn alǵan. 12 jasar Zere men onyń egizi Záýre Astana - Oral baǵyty boıynsha ushyp, ata-anasyna oralýy tıis bolǵan. Alaıda, «FlyArystan» kompanııasynyń ushaǵyn aýystyrýyna baılanysty oryn jetispeı, Zere reıske jiberilmeı qalady. Onyń ornyna 19 jáne 20 shilde kúngi reısterden qalǵan jolaýshylardyń biri otyrǵyzylady.
Áýe kompanııasy qyzdy qonaqúıge ornalastyrýdy usynǵanymen, anasy ony jalǵyz qaldyrýdan bas tartady. Keıinnen Zerege týysy kelgen soń, áýe kompanııasynyń qyzmetkerleri ony reıs jolaýshysy bolmaǵandyqtan qonaqúıge ornalastyra almaıtyndaryn aıtady.
Otbasy ádilettilik izdep jasóspirimniń quqyn qorǵaý úshin sotqa júgindi. Sot olardyń talabyn qoldap, overbýkıng faktisi men kámeletke tolmaǵan jolaýshymen durys qarym-qatynas jasalmaǵanyn rastady. Advokattyń aıtýynsha, azamattyq avıasııa komıteti osyndaı oqıǵalar qaıtalanbaýy úshin túzetýler engizýdi qolǵa alǵan.
«Air Astana» kompanııasy sot sheshimimen kelispese, apellıasııaǵa bere alady.