Soltústik Qazaqstan oblystyq S.Muqanov atyndaǵy ǵylymı-ámbebap kitaphanada jazýshy Ábdijámil Nurpeıisovtiń 100 jyldyǵyna arnalǵan ádebı kesh ótti.
Ábdijámil Nurpeıisov ǵasyrǵa taıaý (98 jas) ǵumyr keship, qazaq ádebıetine ózindik olja salǵan asa iri qalamger. Onyń «Qan men ter» trılogııasyn oqymaǵan qazaq kem de kem shyǵar. Ondaǵy keıipkerler galereıasy, jer-sý ataýlary men olardyń sıpaty Aral óńiriniń tynys-tirshiliginen tolyq maǵlumat beredi. Eger Muhtar Áýezov «Abaı joly» epopeıasynda HIH ǵasyrdaǵy Semeı óńirin tolyq kóz aldyńa keltirse, Ábekeń de óziniń týǵan ólkesiniń tabıǵatyn tolyq sýrettegen. Árıne, ulttyq ustanym, ǵulamalyq, kórkemdik sheberlik, halyqqa janashyrlyq ekeýiniń aıyrmashylyǵyn ashyp, ár avtordyń óz tanymy men nanymyn, bilimi men senimin kórsetip, qoltańbasyn aıqyndaǵan.
Á.Nurpeıisov «Qan men terdi» qaıta-qaıta túzetip, jetildirip otyrǵan. Sóz zergeri Ǵabıt Músirepov: «Qaı aqyn-jazýshynyń bolsa da jyldar ótýine baılanysty, oqýshynyń talap-talǵamy, mádenıeti, bilimi ósýine baılanysty mazmundyq nári suıyla bastaǵan, kórkemdik ajary ońa bastaǵan shyǵarmalary bolýy múmkin. Múmkin ǵana emes, bolǵan, bar, bolady. Sondaı eskirgen eńbekteri baryn jurttan buryn jazýshynyń ózi sezinetin sııaqty», degen pikiri dál osy Ábeńe keletindeı kórinedi.
Jazýshy Soltústik Qazaqstan jurtshylyǵymen, onyń ataqty tulǵalarymen jaqsy qarym-qatynasta boldy. Belgili rámiztanýshy, jazýshy-pýblısıst, aqyn Erbol Shaımerdenov ekeýiniń arasyndaǵy syılastyq keıingi urpaqqa úlgi. Erbol ómirden ótkende 90-ǵa kelgen jasyna qaramaı, Ábekeń Almatydan Astanaǵa kelip, onyń janazasyna qatysty. Sonda jazýshy Ábish Kekilbaev: «Eshkimdi mensine qoımaıtyn, aldyna kelgende tarpıtyn, artyna kelgendi tebetin Ábeńniń ózi Erboldy qalaı qurmetteıtinin kórińizder», degen edi.
Ábekeń alǵashqy romany «Kýrlıandııany» Sábıt Muqanovtyń úıinde jatyp bitirip, Sábeńniń kómegimen baspaǵa ótkizgen. Soǵystan kelgen soldattyń vokzalǵa qonyp júrgenin bilgen Sábeń otbasy músheleriniń kóptigine qaramaı bir aı boıy kitabyn túzetip, úıine qondyryp, kútken. Sábeńniń 100 jyldyq mereıtoıynda Ábekeń Jazýshylar odaǵynyń delegasııasyn bastap kelip, orys tilinde tamasha baıandama jasaǵany este.
Keıin, 2006-2007 jyldardyń birinde oblys ákimi Taıyr Mansurov Ábekeńdi Qyzyljar óńirine arnaıy aldyryp, halyqpen kezdesý ótkizgen tamasha sátter de umytylmaıdy. Kezinde baılardy otbasymen aıdaǵan Aral teńizindegi «Kókaraldyń» mańynda osy Ábekeńniń ata-babasy turady eken. «Kókaraldy» kórgen apalarymyzdyń uzaq óleńderinen: «Jaqaıym degen el eken, Úsh myń shaqyrym jer eken», degen óleń joldary qalǵan. Sol jaqaıymdar aıdalyp kelgen kereılerge qaıyqpen qatynap, tamaq ákelip ketetin kórinedi. Qoldary uzyndary mal soıyp, qysqalary balyq etin jetkizip otyrǵan... Bul da qazaq baýyrmaldyǵynyń bir kórinisi. Sondyqtan soltústiktiń keıbir turǵyndary ata-ájeleriniń súıispenshilikpen aıtatyn jaqaıymdaryn estigende elegizip qalady.
Ábdijámil Nurpeıisovtiń keshinde osyndaı kóp adam bile bermeıtin derekter de eske alyndy. S.Shaımerdenov atyndaǵy gımnazııanyń qazaq tili jáne ádebıeti pániniń muǵalimi Ásem Jaqypova, Abaı atyndaǵy mektep ustazy Gúlnáz Zeınolova, kásibı-pedagogıkalyq kolledjdiń muǵalimi Bota Balǵarına baıandamalarynda jazýshy ómiri men shyǵarmashylyǵynyń kóptegen qyrlaryn ashýǵa tyrysty. Al qart ustaz Qaraqat Shalabaev Almatyda, QazMÝ-de oqyǵan jyldarynda jazýshylarmen, sonyń ishinde Á.Nurpeıisovpen kezdeskenderi týraly qyzyqty estelikter aıtty. Al S.Muqanov atyndaǵy oblystyq qazaq sazdy-drama teatrynyń akteri Qasym Dúısenhan «Qan men ter» trılogııasynan úzindi oqyp berdi.
PETROPAVL