Syn saǵatta ýaqytpen sanaspaı, bar kúsh-qýat, qajyr-qaıratyn jumyldyryp eńbek etken dıqan, mehanızatorlar 4,7 mln gektar alqapqa sińirilgen dándi jáne dándi-burshaq daqyldaryn tap-tuınaqtaı jınap alyp, qut qambasyna quıyp, astyq úshin arpalysta óristetilgen joryqty tabysty aıaqtady.
Erte kóktemnen bastalǵan nóser jaýyn birshama qolbaılaý bolyp, beınet shekkenimen, dala erleri tabıǵat synyna moıyǵan joq. Kúzgi egin oraǵy kezinde de ylǵal mol tústi. Áıtse de, el yrysyn eseleýge den qoıǵan dıqandar kúnniń árbir ashyq sátin utymdy paıdalanyp, qajyrly eńbek etti. Sol eńbektiń arqasynda oblys boıynsha gektar berekesi 14 sentnerden aınaldy. Nátıjesinde, 6,6 mln tonna altyn astyq bastyryldy. Bıylǵydaı mol tabysqa dıqandar táýelsizdik alǵan jyldardan bastap eseptesek, ekinshi ret qol jetkizip otyr. Eginshilik mádenıetin jetildirýdiń arqasynda dál osyndaı kól-kósir ónim 2011 jyly bolǵan eken.
Sheshýshi shaqta daladaǵy eńbek tynysy joǵary ónimdi tehnıkaǵa tikeleı baılanysty ekeni belgili. Memleket qoldaýynyń arqasynda aýyl sharýashylyǵy tehnıkalary parkin jyl saıyn múmkindiginshe jańartyp kele jatqan óńir dıqandary kúzgi dala jumystaryna 9 myńǵa jýyq tehnıka paıdalandy. Onyń ishinde ónimdiligi joǵary astyq kombaındary, aýqymy keń jatkalar men júk kólikteri bar. Jańa eginniń ónimin qabyldap, saqtaýǵa 66 lısenzııalanǵan astyq qabyldaý kásiporny atsalysty. Aýyl sharýashylyǵy qurylymdarynda 1,5 myńnan astam astyq qoımasy bar.
«Dıqandardyń eńbegi eresen. Olar bar jan-tánimen eńbek etti, – dep atap ótti oblys ákimi Marat Ahmetjanov Shortandydaǵy A.Baraev atyndaǵy Aýyl sharýashylyǵy ǵylymı-óndiristik ortalyǵynda óńirdiń jetekshi ujymdarynyń qatysýymen ótken keńeste. – Jerde ósken dán sol jerge tógilgen qarapaıym eńbekkerlerdiń mańdaı teri».
Aqmola oblysy